يعود
شريف ويوسف إلى الخيمة ليجدا الذعر على وجوه الجميع.. الكل يطلق تفسيره الخاص..
الشكوك تحيط بكل التفسيرات والشائعات كثيرة جدا لدرجة أنها باتت أكثر صدقا من
الحقائق المجردة لدى الكثيرين.
أبو
نادي بثقة خبير بالأمور: دا جزء أساسي من اللعبة ورجالتهم دلوقتي ماليين الميدان
ينشروا الإشاعات
يوسف:
احنا سمعنا ييجي 100 تفسير واحنا جايين وكل واحد عمال يألف قصة ويحاول يقنع الناس
بيها
شريف:
بس الناس مش هبلة لدرجة تصديق اللي بيتقال
نادية:
لا الناس في الوقت دا ممكن تصدق أي حاجة
عبير:
الناس الجاهلة أو اللي مش متعلمين فعلا ممكن يصدقو الإشاعات بسهولة.. بس المتعلمين
طبعا لأ.. ولازم يفكرو ويحسبو الموضوع بالمنطق
شريف:
بلاش والنبي النظرية بتاعت ولاد الناس دي
يوسف:
في الظروف اللي زي دي ما ينفعش نقسم الناس متعلمين وجهلة.. الأصل إن الناس الخايفة
بتتصرف بتلقائية أيا كانت درجة ثقافتهم
نادية:
بس برضه زي ما قالت عبير دور المثقفين دلوقتي يوعو الناس الأقل ثقافة. ويحاولوا
يفهموهم.. تتمتم: لو كانو هم نفسهم فاهمين يعني
أبو
نادي: يا جماعة اهدوا بس.. شوية وهنفهم ايه اللي بيحصل!!
شريف:
ويمكن ما نفهمش وتفضل الإشاعات والتحليلات العبقرية بتاعت المثقفين واتهامهم للناس
الغلابة بإنهم مش فاهمين حاجة شغالة يا عم حسين
عبير
في تحدي: انت بتقصدني أنا بالكلام دا؟!! أنا كان قصدي إن دور المثقف في الوقت اللي
زي دا إنه يعمل توعية للناس اللي مخدوش حقهم من الثقافة زيه
نادية:
أنا رأيي كدا برضه
يوسف:
بس الثقافة مش تعليم.. فيه ناس شعبيين ومش بيقرو ولا يكتبو.. وبيفهمو أحسن من
أساتذة الجامعة
أبو
نادي: معاك حق يا يوسف.. وبرضه نادية وعبير معاهم حق
شريف:
الكلام دا كلام فاضي ولا هيودي ولا يجيب
يوسف
لنادية همسا: هدي اللعب.. انتي عارفة إن أعصابه بتبوظ لما يبقى مفلس
نادية
تومأ برأسها موافقة على كلام يوسف: احنا مش هينفع ببساطة كدا نقول إن المجتمع كله
على درجة واحدة من الوعي والثقافة... دا حال البلد ودا اللي عمله فيها مبارك
أبو
نادي: من قبل مبارك والله يا نادية.. الوعي بيتضرب من قبل مبارك بكتييير
"قالها بتطويل واضح للتأكيد على طول السنوات"
يوسف:
صحيح.. فيه حالة تغييب لوعي المصريين من أيام عبد الناصر.. بس مبارك قسم البلد
فعلا لفريقين بالفقر والجهل والفساد
شريف
في حدة: يا ناس ارحمونا بقى من التقسيم بتاع النخبة والشعبيين اللي دايما النخبة
الغنية فيه بتبقى مثقفة وبتاكل بالشوكة والسكينة وحريصة على البلد، والشعبيين إما
حرامية أو نصابين، أو جهلة مش فاهمين حاجة
يوسف
غاضبا: أنا مقولتش كدا.. ورأيي إن دا مش موجود على الأرض.. يمكن العكس هو الصحيح
في كتير من الحالات
أبو
نادي محاولا تلطيف الجو: فكرتوني بواحد من الشعبيين زي أسامة أنور عكاشة، اللي هو
أصلا ناصري متشدد لأخر نفس، لما عمل التقسيمة دي في مسلسل "الراية
البيضا".. يستدرك: أصلا على رأي الواد شريف.. عبد الناصر هو "أُس"
البلاوي
نادية
مازحة: حتى انت هتعوم على عومه يا أستاذ حسين.. طب هو شريف دا كدا ما بيعجبوش حاجة
وبيكره عبد الناصر زي اسرائيل
شريف:
ليه بس يا نادية؟! انتي مش شايفة عبد الناصر هو السبب في اللي احنا فيه دلوقتي؟
عبير:
بس عبد الناصر عمل حاجات كويسة كتيير.. الموضوع ما ينفعش يتاخد بالشكل دا.. أبويا
وعمي وغيرهم اتعلموا في عهد عبد الناصر
شريف:
أومال عبد الناصر ابن البوسطجي اتعلم ازاي بقى؟ ولا قبله بسنين طه حسين؟ أصلا طه
حسين هو صاحب مجانية التعليم في عهد الملك فاروق، وعبد الناصر سرقها زي العادة ونسبها
لنفسه والإعلام وكتبة التاريخ المزورين عملوها حقيقة
يوسف
ساخرا: شريف جاتله الفرصة يجلد عبد الناصر ومش هيسيبها
شريف
في ضجر: ولا فرصة ولا بتاع.. عبد الناصر خربها وساب لنا أجيال مخدوعة فيه وعمالة
تدافع عنه بالحق والباطل
يوسف
بقهقهة: انت كدا بتخبط في أنا وعمك حسين بقى!!
أبو
نادي: والله يا يوسف ساعات بابقى حاسس إن معاه حق.. ولو إني مش قادر أتخيل شكل
البلد كان هيبقى ايه من غير الفترة بتاعت عبد الناصر.. بس كمان جيلي كله معدش قادر
يحط وشه في وش الشباب دلوقتي من المصايب اللي سابها عبد الناصر للي بعده
يوسف:
بس ايه يا حسين حكاية "الراية البيضا" أنا مليش في المسلسلات قوي بس
فاكر إن ناس كتيير كتبت عنه كويس
أبو
نادي: تخيل يا أخي محمد فاضل وأسامة أنور عكاشة الاتنين من عصر عبد الناصر اللي
كان كل همه الناس تنسى الطبقية اللي قامت ضدها الثورة وعلى الإقطاع والباشوات
والواسطة، لكن عبد الناصر نفسه للأسف بعد كام سنة كان السبب في ظهور اقطاعيين
وباشوات جدد بسبب سكوته على بلاوي رجالته من الضباط الصغار اللي السلطة غيرتهم..
تخيل لما الاتنين دول يعملو مسلسل مليان بالطبقية!!
عبير:
طبقية إزاي؟! المسلسل كان بيحكي عن تراث البلد اللي كان بيحاول يحميه أستاذ جامعة بالقانون
ومعاه اتنين شباب مثقفين.. ضد تاجرة جاهلة وفاسدة عايزة تسيطر على كل حاجة بفلوسها
شريف:
المشكلة إن هو دا اللي وصلك.. لأنك من الطبقة بتاعت أستاذ الجامعة وبتفكري بنفس
طريقته.. هو أستاذ الجامعة اللي عايش بالشوكة والسكينة في قصر معزول عن الحياة
الحقيقية والبشر الحقيقيين ازاي ممكن يكون غير نموذج جديد للباشاوات والإقطاعيين
اللي عبد الناصر قعد سنين يكذب ويقول إنه هو والضباط الأحرار قاموا بالثورة عشان
يخلصوا البلد من فسادهم وظلمهم؟
عبير:
أنا قلتلك مرة واتنين تلاحظ كلامك معايا وانت برضه مصمم على طريقتك دي.. شيء مش
ممكن أبدا..
شريف
متهربا: ما تغيريش موضوع الكلام
نادية
بحسم: بس هي معاها حق يا شريف. هي بتقول رأيها اللي يمكن ما يعجبكش زي ما انت
بتقول كلام مش لازم يعجبنا كلنا.. انت فعلا طريقة كلامك معاها سخيفة أوي
عبير:
ازاي ممكن نساوي أستاذ جامعي محترم قرر يتصدى لقضية مهمة هي حماية التراث رغم الخطر
اللي بيواجهه بسبب استخدام المعلمة واللي معاها لكل أساليب الإجرام. إزاي تساويه بالإقطاعيين
الفاسدين؟
شريف
موجها كلامه لعبير متصنعا الهدوء: انتي كدا بتحولي القضية مش بس بتغيري الكلام..
عم حسين كان بيتكلم عن تصوير المسلسل للمثقف على أنه عايش ملاك وما بيغلطش وكل
اللي بيعمله صح وهو الحريص على البلد واللي فيها.. وإن الفقراء والشعبيين جهلة
وحرامية وكل همهم يسرقوا أو ينصبوا وبس.. ودا طبعا مش حقيقي أبدا
أبو
نادي: أنا مشكلتي مش تصوير المجتمع كدا وبس.. المشكلة إن التصوير دا ييجي من ناس
مفروض إنهم مؤمنين بقيم الاشتراكية والناصرية اللي أول تعاليمها إن الناس سواسية
شريف:
بس يا عم حسين دي شعارات وكلها كدب مش تعاليم ولا مبادئ خالص
يوسف:
أنا كمان متفق مع شريف إنها في الأخر طلعت كلها كدب
أبو
نادي: هي في الأول كانت مبادئ وتعاليم وكان الكل ماشي عليها.. بس مع الوقت كله بقى
بيتعامل معاها باعتبارها قيود ولازم يتخلص منها
يوسف:
مع مرور الوقت ازاي؟ قصدك بعد 1954 ولا بعد كدا؟
أبو
نادي ضاحكا: ههههههه انت اللي قصدك ايه يا يوسف؟
يوسف:
قصدي يعني المبادئ كانت خدعة كبيرة من أول يوم، بدليل إن عبد الناصر أول واحد
خانها لما عزل محمد نجيب لأنه كان عاوز يسلم السلطة للمدنيين ويعمل انتخابات
ديمقراطية ويرجع العساكر للثكنات
شريف:
أيون بقى يا يوسف. فكرهم والنبي. أصل فيه ناس فاكرين عبد الناصر ملاك وكان همه
مصلحة البلد مش مصلحته الشخصية
عبير
في ضيق واضح: انتو بتكرهوا عبد الناصر أكتر من مبارك.. مش ممكن؟!
أبو
نادي: عبد الناصر بني أدم ليه أخطاءه وبعضها كمان خطايا للأسف
شريف:
عبد الناصر هو السبب في اللي احنا فيه دلوقتي كله. لولا عبد الناصر كان زمان مصر
زي اليابان أو ألمانيا.. أو على الأقل ماليزيا
يوسف:
بالراحة يا عم شريف.. مش للدرجة دي يعني.. ظروفنا والمنطقة اللي احنا عايشين فيها
غير اللي انت بتتكلم عليه دا
أبو
نادي: وثقافة شعبنا مختلفة عن الشعوب اللي بتتكلم عليها دي كمان يا شريف.. احنا
شعب اتعود يحكمه غيره من أيام الفراعنة
شريف:
يعني برضه المشكلة في الناس مش في الحكام؟
يوسف:
لا طبعا.. المشكلة في الحكام اللي بوظوا الناس
نادية:
أنا زهقت منكم ومن الجدل دا أصلا.. إلا انتو شايفين هيحصل ايه لو مبارك مشي؟
شريف:
العسكر هيمسكوها أكيد.. ويجيلنا زعيم جديد غالبا هيكون سامي عنان اللي هيعمل في
طنطاوي زي ما عبد الناصر عمل في محمد نجيب
يوسف:
بيتهيألي الوضع السياسي والزمن مختلف.. واللي يرضى بإن العسكر يمسك يبقى ابن ستين
كلب أصلا
أبو
نادي: أنا شايف إن ممكن العسكر يمسك شوية.. ما يطولش زي ما انتو فاكرين.. بس الخوف
من اللي بعد العسكر
عبير:
انتو بتتكلمو وكأن مبارك ركب الطيارة وهرب زي رئيس تونس!!
شريف:
أنا شايف إن العسكر مش هيسيبوها
يوسف:
أنا بقى كل خوفي مش من العسكر لكن من الإخوان
شريف:
بس برضه الإخوان أرحم من اليساريين والناصريين يا يوسف
نادية
تضحك: على رأيك.. ما أزفت من سيدي إلا ستي
عبير:
أنا برضه مش عارفة انتو بتفرضوا سيناريوهات على أي أساس.. مبارك مكمل ومش هيمشي
أصلا
شريف
زاعقا: ما ترحمينا بقى يا أنسة.. انتي مستخسرة فينا حتى الحلم
عبير
تنتفض من مكانها قائلة: ايه الطريقة دي.. انت امتى هتبطل تتعامل معايا كدا؟
يوسف:
جرى ايه يا شريف.. انت ماسكلها على الكلمة ليه؟
أبو
نادي: هو دا عيب جيلكم.. مش عاوز حد يتكلم غيره ولا حد يراجعه في كلامه
نادية:
أنا زهقت فعلا من الطريقة دي.. اللي انت بتعمله دا ديكتاتورية على فكرة
شريف:
دا على أساس إن جيلكم أحسن من جيلنا يعني.. ولا على أساس إنكم لما كنتم في عمرنا
مكنتوش بتعملوا كدا؟!
يوسف:
احنا بنتناقش مش بنتخانق يا شريف.. ما تعلقش على كلام حد بسخرية تاني
شريف:
أنا أصلا مش عاوز أكمل نقاش.. هاروح أعمل حاجة نافعة أحسن.. لجان التأمين أفيد من
الرغي الفاضي اللي احنا بنعمله دا
نادية
في غضب: انت كدا بقيت قليل الأدب كمان
أبو
نادي في محاولة للتهدئة: خلاص يا نادية.. روح يا شريف رووح
يسمح بنقل أو استخدام المواد المنشورة بشرط ذكر المصدر أي نوع من التعدي يعرض صاحبه للمسائلة القانونية
ليست هناك تعليقات:
إرسال تعليق