الاثنين، 10 نوفمبر 2008

الأولة أه.. لازم أقول ليه؟

بقالي كام يوم مش عاوز أشتغل
عندي حالة من الزهق والقرف رغم إني في موسم شغل "هاي سيزون"
بس مش قادر أركز في شغلي على غير عادتي
كاره أماكن الشغل كلها
وكاره كتابة أي حاجة
ما أكدبش عليكو بقالي سنة باعيش الإحساس ده على فترات متقطعة
مرة كل شهر أو شهرين
بس كنت كل مرة باقدر عليه وأخرج منه بالإنغماس أكتر في الشغل
أو الإنشغال في موضوع مهم باحب أشتغل عليه
غالبا بيكون شرير في بدايته
بس بيطلع حلو وبيعجب ناس كتيير إلا أنا
لأني الوحيد تقريبا اللي عارف إنه مجرد وسيلة للهرب من حالة الزهق القاتلة اللي باعيشها
لكن المرة دي الموضوع طول معايا
خصوصا إنه جاي في توقيت سيء جدا
عندي طلبات شغل كتيير
وعندي أحداث محتاجة إني أكون فايق ومركز
بس برضه مفيش فايدة
مش قادر أجبر نفسي على الخروج من البيت
رغم إني باكره قعدته خصوصا لو كان فاضي زي الفترة دي
العيلة كلها في البلد وأنا home alone
كنت بادون زمان ووقفت مدوناتي
واكتفيت بالفيس بوك
لكن مؤخرا الفيس بوك نفسه بقى خنيق
فقررت أرجع تاني للتدوين
دورت على مدونتي القديمة عجيبة عجايب
ما عرفتش أوصلها وربما ما دورتش كويس من كتر خنقتي
فقررت اعمل مدونة جديدة
أفضفض فيها وأفك عن نفسي
يمكن الخنقة تروح عني وأرجع أشتغل تاني
أنا أصلا مش بألاقي نفسي إلا في الشغل
بقالي ست سنين باشتغل 18 ساعة يوميا
ومؤخرا بقيت باهلوس بالشغل وأنا نايم
ومراتي ضبطتني أكتر من مرة
الله يحرق الشغل
وليحيا التدوين من جديد
حدث خطأ في هذه الأداة