الأحد، 24 مايو، 2015

طارق عمر الشريف: بابا عنده ألزهايمر من 3 سنين




امبارح طارق عمر الشريف، الابن الوحيد للنجم المصري العالمي عمر الشريف، قال لصحيفة "إلموندو" الإسبانية الشهيرة، إن والده النجم الكبير يعاني من مرض "ألزهايمر" منذ 3 سنوات.

طارق (58 عاما) واللي عايش طول عمره خارج مصر، قال للصحيفة إن والده (83 عاما) بقى بينسى أسماء أشهر أفلامه، ومعظم التفاصيل عن أدواره الشهيرة.

تصريحات طارق المثيرة واللي تداولتها معظم الصحف والمواقع العالمية، إمبارح والنهاردة، تؤكد معلومات وشائعات متداولة منذ فترة إن سبب إعتزال عمر الشريف هو إنه معدش قادر يفتكر تفاصيل أو حوار الأدوار اللي بتتعرض عليه، وبالتالي مش قادر يجسد أي شخصية.


إيناس بكر المتحدثة باسم عمر الشريف كانت نفت من سنتين شائعات ترددت عن إصابته بـ"ألزهايمر"، وقالت إن الكلام دا "عار عن الصحة".


لكن كلام طارق الشريف الأخير يؤكد الشائعات السابقة، هو كمان قال إن والده في مرحلة غير معروفة على وجه التحديد من ألزهايمز، وإنه لا يتوقع تحسن حالته، بل يمكن تسوء أكثر.




وقال طارق ان والده في بعض الأحيان يظهر عليه بعض التحسن وأحيانا أخرى يبدو مرتبكا، وساعات لا يعرف سبب اهتمام الناس به في الشارع أو طلبهم منه التوقيع على أوتوجرافات ، لكنه لا يزال يتذكر أنه نجم شهير، ولازال دائم السؤال عن والدة طارق النجمة فاتن حمامة اللي توفيت في يناير الماضي، رغم من إنه أبلغه بوفاتها بعد ثلاثة أيام.

شخصيا عندي ذكريات مش لطيفة مع عمر الشريف، بدأت في 2007، في المؤتمر الصحفي للإعلان عن مسلسله "حنين وحنان"، اللي اتعمل في الإسكندرية، الراجل كان مركز في المؤتمر وبيتكلم كويس عن الدور والعمل ككل،، لكنه في نفس الوقت كان عصبي ومتوتر ومش مستحمل أي حد فينا يوجهله سؤال صريح.

وفجأة نزل تحت الترابيزة في وسط المؤتمر، ومحدش فينا كان عارف إيه اللي بيعمله، وطلع وهو مبسوط وأكثر هدوءا، وعرفنا بعدها إنه كان بيشرب.








يسمح بنقل أو استخدام المواد المنشورة بشرط ذكر المصدر أي نوع من التعدي يعرض صاحبه للمسائلة القانونية
حدث خطأ في هذه الأداة