السبت، 25 أبريل 2009

باعونا



بعد النجاح الساحق اللي حققته التشريدة
زميلتنا منى باشا اقترحت أن نسجل كل ما عايشناه في البديل في بوست أطلقت عليه اسم باعونا
ولما كنت أحد المدعوين للمشاركة فكرت في طريقة جديدة هي حث أعضاء مجلس الإدارة على نشر تلك الخواطر والأراء على موقع البديل
هو احنا يعني مش زي خالد البلشي وأمنية طلعت وسامر سليمان
ولا مش زي هاني درويش اللي تدوينته قعدت على الموقع أربع خمس أيام واتشالت من غير سبب زي ما اتنشرت من غير سبب
المهم رحت قابلت واحد من أعضاء المجلس الموقورين
وجرى بيني وبينه الحوار التالي بدون أي تدخل تحرير مني


= أنا
- العضو المحترم
=عاوزين ننزل التدوينات والكتوبات بتاعتنا على الموقع
- ما ينفعش خالص
=طب ليه بدل ما الصفحات فاضية كده
- فاضية أحسن من الكلام اللي بتكتبوه وكله هجوم على الإدارة
= دي شوية تنفيس عن الغضب مش هتضر حد منكم
- دي قلة حيا ومسخرة
= انتوا مستخسرين فينا حتى الكلام
- الكلام له أصول وانتوا زودتوها خالص
= معلش شوية عيال خليكوا انتوا الكبار
- انتو خليتوا فيها كبار ولا صغار احنا سكتنا وقلنا بكره يهدوا ويفكروا بعقل لكن واضح انكم عيال عايزه تتربى
= طب ليه المعاملة دي؟؟
- انتوا ميجيش معاكوا غير العين الحمرة
= حاسس إني باكلم لوا في أمن الدولة مش عضو مجلس إدارة جريدة معارضة
- ومالهم بقه بتوع أمن الدولة روخرين
= احسن ناس
- طبعا انته تقدر تقول غير كده
= لا طبعا
- عملنا منكم صحفيين وبقت اساميكم معروفة بعد ما كنتوا مالكوش لازمةوأخرتها عاملين فيها كتيبة علينا
= ما انتوا قفلتوا الجرنال اللي كنا بنفك غلنا في الكتابة فيه
-احنا بنعيد تقييم الأوضاع يا غبي
= معلش خدني على قد عقلي وفهمني
- مفيش فايدة فيكم عمركوا ما هتفهمو
= طب طول بالك وحاول معايا وأوعدك اسمع واركز
- احنا عاملين كده عشان العين كانت علينا جامد الكام يوم اللي فاتوا
= أه عارفه ده الألبوم الأخراني بتاع لطيفة
- ايه اللي دخل لطيفة دلوقتي؟؟
=مش بتقول الكام يوم اللي فاتوا
- يا ولد افهم بقه الله يخرب بيت اللي خلاكوا صحفيين
= أمييييين
-وبعدين بقه
= اسف حقك عليه .. كمل
- إحنا كنا بنحاول نوقف مفعول العمل اللي معمول للجرنال
=عمل يا نهار اسود
- أه عمل تحتاني على فلاشة زرقة ماركة كينجستون 2 جيجا
= كمان 2 جيجا
- أيوه امال انته فاكر ايه
= وبعدين
- الشيخ الروسي اللي روحناله قال لازم الجرنال يبان مفلس وبيقع عشان العمل يتفك
= يعني انتوا مش مفلسين فعلا
- فشر
= طب يعني مفيش مشكلة وهترجعوا قريب
- دي بقه ما أوعدكش بيها
= ليه بقه طيب
- الشيخ الروسي لسه ما قلشي
= طب ما تسأله
- هو ما بيحبش حد يسأله
=طب والعمل
- الصبر
= صبر .. منين
- يوووه أدي بقه عيب جيلك كل اللي اتولدوا بعد سنة سبعين متهورين
=بس فيه ناس اتولدوا سنة أربعين وسنة خمسين وبرضه متهورين
- انته بتلمح لإيه؟
= ولا حاجة بس عاوز أقول إن التهور ده مالوش علاقة بالأجيال
- لا طبعا له علاقة .. ايش فهمك انته
= ماشي خليله علاقة.. المهم فهمني ايه الوضع
- يبقى الوضع على ما هو عليه مؤقتا لحين صدور تصريح من الشيخ الروسي
= ولو ما طلعش التصريح
- يبقى احنا عملنا اللي علينا ساعتها
=يعني يفضل الجرنال مقفول
- انته جاهل وفاشل وعمرك ما حتفهم
= ما أنا قلتلك فهمني
- أنا مش هاضيع وقتي ما ولد زيك
= انته رايح فين
- رايح ندوة
= مع أحمد زكي
- أحمد زكي مين؟
=بتاع هو وهي
- ايه ده
=المسلسل اللي كانت بطلته معاه سعاد حسني لما قالتله رايحة الكوافير قالها رايح ندوة.. وبعدين بتحبني أيوه يا ننوسة طب قد ايه قد البسبوبة قالتله متحبنيش بالشكل ده قالها ما باحبكيش بالشكل ده قالت أهو قاللي مش بيحبني يا ناس يخلصكم كده
- امشي يا ولد اطلع بره .. بارااااااه




طبعا مش محتاج أقولكم إن الحوار من نسج خيالي
يعني لو حد عقله راح كده ولا كده
هو حر
أنا ماليش دعوة

ليست هناك تعليقات:

إرسال تعليق