تدوينات كاشفة على لسان ضابط في الجيش المصري.. قلعة الفساد المباركي

يعني ايه ؟!

الظابط ده عمل أكونت على تويتر يوم السبت 28 يناير وكتب كل التويتات دي وتم غلق الأكونت بعدها بيوم.. ورجع اتفتح تاني.. الكلام أغلبه منطقي.. اقروا وقولوا رأيكو..

الملازم أول: محمد وديع

ظابط في الصاعقة

رقمه العسكري ١٢٦٤٣٣

ملازم أول/ محمد وديع الوحدة ٩٩٩ قتال سابقا ضباط ٨ أبريل حاليا والعمر واحد والرب واحد

يعني ايه قسم؟ يعني ايه أقسم بالله العظيم أن أكون جنديا وفيا لجمهورية مصر العربية؟

طيب يعنى ايه نكتب بأجسامنا مصر مبارك مبارك مصر؟؟

يعنى ايه قبل قرار تنحي مبارك يتسرح ١٨٠٠ مسجون من السجن الحربي منهم اغتصاب وقتل على طريق مصر الاسماعيلية؟؟

يعنى ايه اللوا صلاح الشربيني لصف ظابط هاديك شلوط تطلع عند ربنا يقولولك جاي منين تقولهم من عند اللوا صلاح يقولولك ارجع مش عايزين مشاكل

يعني ايه اللواء الرويني يغلق مسجد المنطقة المركزية ويمنع الصلاة فيه بعد ما صلى فيه المخلوع علشان يفضل محافظ عليه لحد ما ييجي يصلي تاني؟؟

يعني ايه الديكتاتور مختار الملا يتكلم عن الديقراطية؟؟

يعني ايه الضايع سامي عنان يخطط لجيش مصر؟؟

يعني ايه ممدوح شاهين التايه يشرع لمصر؟؟

يعني ايه النقيب أحمد حمام والرائد أشرف عبد الحميد والملازم مينا أبطال موقعة العذرية ما حدش يعرف عنهم حاجة؟

يعني ايه قائد الفرقة التاسعة المشاة الميكانيكي يأمر صغار الضباط بالإفراج عن الأحصنة والجمال وأصحابهم علشان يروحوا ينفذو مذبحة في التحرير؟؟

يعني ايه ابن المشير يروح مخابرات عامة ما تعجبهوش يروح رقابة ادارية يزهق يرجع العامة تاني عزبة بابي؟؟

يعنى ايه ابن المشير يخترعوله منصب عند تخرجه من الشرطة المنسق العام بين وزارتي الدفاع والداخلية؟؟

يعني ايه جميع أولاد لواءات القوات المسلحة إما مخابرات عامة أو رقابة إدارية؟؟

يعني ايه في العروض والاستعراضات نصرف ملايين على الفشخرة الكدابة زي اللي بياخد هرمونات في الجيم ومافيهوش نفخة؟؟

يعني ايه هشام ماهر في لواء الوحدات يسرق بنزين للسيل علشان ينفذوا التدريب؟

الصاعقة البحرية رفضت ضرب المتظاهرين أمام المنطقة الشمالية والصاعقة البرية دغدغت زمايلها قبل الناس يوم ٨ أبريل مين وصلهم لكده؟؟

ضباط لواء الوحدات الخاصة رجال الضفادع البشرية رفضوا ضرب المتظاهرين أما الـ٧٧٧؟؟

يعني ايه الشرطة العسكرية اللي بتأمن المحاور وتحول الطرق ولها مهمة محترمة في الحرب يحولها بدين لمباحث مكافحة الثوار؟؟

يعني ايه الصاعقة المصرية أحد مصادر رعب اسرائيل ماسكين عصيان وطالعين يجروا ورا الناس في الشوارع بقيادة اللواء سامي سعد زغلول؟؟

يعني ايه ظابط مظلات الباريه بتاعه متوحد على مستوى العالم قافز حر قوات خاصة يفتخر بضرب البنات كإنه فتح عكا مين وصله ده؟؟

يعني ايه قائد السجن يقوللي يا ابني المشير لا دريان بيا ولا بيك يلا حسن الختام أومال دريان بمصر ازاي؟؟

يعني ايه اللوا الفخراني يكلف بوابة ٩ مليون الرقابة الادارية تزعل يطلع معاش ويتعين محافظ الاسماعيلية؟؟

يعني ايه القبة السماوية في الكلية الحربية تتكلف ٤٥ مليون جنيه في عهد مختار الملا؟

يعني ايه حمام في الصحراء يتكلف ٢ مليون جنيه يعملوا خبير ألماني لإحتمال قدوم مبارك لعرض المنطقة الغربية؟

يعني ايه الرويني في المنطقة المركزية للضباط ثورة ايه وخره ايه احنا غلطانين إننا ما دسناش عليهم بالجزمة؟؟

يعني ايه مختار الملا في معهد المدرعات للضباط هما فاكرين إنهم عملوا ثورة لكن احنا هانوريهم حبة العيال؟

يعني ايه اللواء الفنجري وسيد البرنس يقولوا احنا حطينا روحنا على كفنا ضد مبارك ولولا اللي عملناه بإنعقاد المجلس ما كانتش الثوره نجحت؟؟

يعني ايه محسن الفنجري يقول لما نغير المحافظين والمحليات والجامعات والداخلية تبقى فين الدولة بقى؟؟

يعني ايه محسن الفنجري يقول في لقاء بالسجن الحربي الحركات الشبابية دول هما اللي بوظوا الثورة ونصفهم عملاء وخونة ونصفهم مغيبين؟

يعني ايه كل الفلوس والذهب والموبايلات الأحراز في السجن الحربي تتباع وتوزع مكافأت على الضباط والجنود؟؟

يعني ايه جميع محتويات مقر الحزب الوطني تبقى بقانون غنائم الحرب في مخازن الفرقة الثانية مشاة ميكانيكي وهو كده؟؟

يعني ايه الجبن يبقى أهم صفات المقاتل!!!!

يعني ايه المشير يقول على طلبة الكلية الحربية بعد خناقة ١٥ مايو الطلبة دول أنا كنت قادر أحرقهم!!

لعبت كورة مع المشير فى ٢٠٠5 وكان ضدي وبيلعب مع المعهد الفني واحنا حربية

إله الملاعب أما لو انت على دكة البدلاء وسيادته جه يلعب رمية تماس تقف انتباه من حديد لحد ما يلعب ويدخل الملعب تاني تقوم قاعد

ولو بتلعب معاه تباصيله كتير ولو الجون فاضي وهو جنبك لازم هو اللي يجيب الجون لو الكورة اتقطعت منه تجري بسرعة وتحاول ترجعهاله

تعليمات الماتش ما تدخلش عليه ماترقصهوش سيبه يرقصك ما تشوطش وهو واقف حواليك ما تلمسهوش واللي اداني التعليمات لواء مدير جهاز الرياضة

يعني ايه الرئيس المخلوع بتتبنيله فيلا فى السجن الحربي دلوقتي ومستشفى السجن بتتجهز لتصبح سبع نجوم تحسبا لأي احتمالات

يعني ايه الرويني في المتحف المصري لما ما يعجبوش حد يقول يا تسعات فسحوه ياخدوه وحوش الـ٩٩٩ ورا المتحف لحد ما يبانلو صاحب مسلسل الوسية ده؟

يعني ايه أخد فرقة السيل يبقى عادي وأخد القائد بتاعي أوصله وأنا مروح أبقى أشطر ظابط في الوجود؟؟

يعني ايه المخابرات العامة يمسكها لواء وهيئة الرقابة الإدارية يمسكها لواء والمحافظين لواءات الدولة كانت الجيش مش حسني مبارك؟

يعني ايه لما تتكلم في التطوير والتدريب يتقال لك اسكت ماتوديش نفسك في داهية؟

يعني ايه تلاتين سنة التوفيق وامتداد رمسيس وخلف العبور وإذ فجأه قصور في التجمع الخامس والرحاب ومدينتي والشروق؟؟

يعني ايه مرتب الملازم ٢٠٠٠ جنيه ومرتب اللواء ٥٠٠٠ جنيه والفرق بينهم ٣٠ سنة عمل سياسة تجويع وحرمان؟؟

يعني ايه حصاد هدايا زفاف ابن احد اللواءات ٢٥٠٠٠٠ جنيه ذهب

والله العظيم المشير ما عايز يضحك على الشعب والله العظيم المشير عايز يكسر إرادة الشعب

طيب يعني ايه يصبح عرف مستديم في احتفالات القوات المسلحة ذبح عجل تحت أقدام المشير نوعا من القرابين والأضحية لسيادته؟؟

يعني ايه لما أرفض الكلام في المخابرات يتقاللى لدينا من الوسائل والأساليب اللي يخليك تعترف على نفسك إنك جاسوس وانت مش جاسوس؟؟

طيب يعني ايه يتقاللي من لواء مين علاء الأسواني ده اللي أهم انجازاته عمارة يعقوبيان هو خلاص كده أصبح أديب؟؟

يعني ايه يعلموني في الخطة إرادة فض الشغب والتظاهر اوعي تضرب طلقة في الهوا لا يفتكرونا نازلين نهزر اضرب في المليان؟؟

يعني ايه عصابة خلصت على الجيش وبتخلص على مصر دلوقتى؟؟

يعني ايه أبقى عارف قد ده ميت مرة والناس تقول شرفاء الجيش فين وما أنزلش يوم ٨ أبريل؟؟؟؟؟

يعني ايه ظابط واقف قدام مقر رئيس الجمهورية بدبابة ومعاهوش طلقة فشنك ياخد أمر ما يعدوش غير على جثتك؟؟

يعني ايه ٦٥ يتدفنوا جنب السجن الحربي وأهاليهم بيدوروا عليهم لحد دلوقتي؟؟

يعني الظابط اللي ساكت خاين واللي اتكلم تبع المجلس طيب نعملكم ايه علشان تفهمو؟؟

يعني ايه الوحدة ٧٧٧ والوحدة ٩٩٩ وحدات ارهاب دولي توضع في مواجهة مع مواطنين مصريين؟؟

يعني ايه قائد الفرقة الثانية مشاة ميكانيكي يشرف على التعذيب داخل المتحف المصري؟

يعني ايه لما أسكت أبقى خاين ولما أتكلم أبقى بأعمل فتنة؟

يعني ايه الطيران الحربي يشارك في تهريب أموال؟؟

يعني ايه حسن الرويني يأمر بتأمين أبناء مبارك من مصطفى محمود للتحرير ١ فبراير؟؟

by: Mohamed Elghazaly






يسمح بنقل أو استخدام المواد المنشورة بشرط ذكر المصدر أي نوع من التعدي يعرض صاحبه للمسائلة القانونية