الثلاثاء، 22 مايو، 2012

ايناس الشواف تكتب: تجربتي مع مرشحي الرئاسة خلال حملاتهم الانتخابية





عندى يقين كامل أن كواليس أي عمل تكون أصدق ما فيه.. وعلشان كده حبيت من باب الامانة الاعلامية أنقل كواليس اعداد برنامج الرئيس القادم اللى نزل في الاذاعه عندنا يمكن تفرق مع حد ف قراره.. يعنى يبقى سمع برنامج مرشحه وعرف المرشح ده حملته كانت عامله ازاى واتفاقهم كان ازاى .. ما اللى يضبط حملة اعلاميه اعتقد ده مؤشر لقدرته على اختيار بطانه حواليه .. حبدأ بالحلقات (بترتيب المجىء) فالاذاعه .. بديت اكلم حملة كل مرشح الخميس 26 ابريل .. وكان رد كل حمله الاتى:

ابوالفتوح: كانوا قايلين لى كلمينا السبت .. مردوش بعتلهم رساله واليوم اللى بعده كلمتهم ردوا واعتذروا انهم مردوش امبارح حسب الاتفاق وقالولى ادينا يومين ونبلغك المعاد لان احنا بنصفى ننزل ف ايه .. التلات (بعديومين بالضبط) كلمونى وقالولى حنبقى هوا اول ظهور اذاعى للدكتور وحنبقى الاتنين 7 مايو .. توقعت يسألوا عن الاسئله او يحطولى خطوط حمرا محصلش ..قلت يبقى ليلة الهوا حيطلبوا ده مرشح رئاسه .. وفعلا الاحد لقيت واحد من الماسكين حملته بيقولى انتم محددين محاور معينه للحوار ف قلتله عايز الاسئله قالى لايافندم انا بعرف علشان نلحق نضبط اولويات المحاور لكن اسألوا فاللى عيزينه !! كل اللى طلبه منى مسؤل الحمله انى منزلش اغانى لايت متكنش مناسبه للحوار وقالى نختار اغانى هادفه ولو ممكن ننزل اغنية ابوالفتوح الدعايه .. ده كان طلب مش شرط .. يوم الاتنين الساعه 4 وعشرة كان الدكتور فالاستوديو معاه كذا حد من متطوعين حملته .. اللى معاه اهتمامهم به ونظرات عنيهم له كان مش اهتمام متطوع بمرشح قد ما هو اهتمام ولاد ب باباهم .. والاغرب ان هو بيسمع لهم ب اهتمام اكتر وبيوافقهم ف نقط كتير بدون اى جدال لدرجه تنسيك ان ده ممكن يبقى ريس .. المهم دخل سلم عالكل وكان فى ناس من مؤيدينه لهم اقتراحات سمعها وناقشهم فالفواصل ولما خلص اتصور معانا ومشي.

عمروموسى: كلمت اللى ماسكه له الحمله بس مردتش لا عالتليفون ولا لما بعت لها رسالة.. بس لان مذيعتنا ناردين انتيمة هانياموسى قدرنا نضبط المعاد.. معاد موسى اتحدد من أول مرة.. الراجل منظم ايامه بشكل متخيلتوش .. كنا كل يومين نقول لبعض خلوا بالكم ليأجل ولاحاجه ده ادانا المعاد من زمان والخوف تجد مواعيد تبوز الخطه بس ابدا الخميس 10 مايو الساعه 11 الصبح تسجيل ونتواجد ف مقر حملته 10 الصبح متغيرش ابدا .. حملته خلية نحل محدش قاعد ورغم اننا وصلنا بدرى لقينا انه كان عنده صحافه قبلنا يعنى بادىء يومه من 9 تقريبا رغم ان ده كان يوم المناظرة الشهيرة .. قبل دخولنا للتسجيل كان طلب الاسئله وحدد يتسأل فى ايه ونبعد عن ايه .. مقابلته ودوده جدا وطبعا حضوره طاغى وكل شويه يطلب لنا حاجه نشربها ويبتسم لنا .. موسى كان مركز ان يتكلم عن برنامجه اكتر من اسئلة الرد على تصريحاته .. وبعدالحلقه اتطلب مننا حذف كلمتين بالضبط .. ده كان بيحصل زمان عادى ايام مبارك .. ملحوظه : موسي كان طالب يكون اول حلقه للبرنامج فقلنا له ادينا معاد قبل 10 مايو طيب علشان نلحق حاول ومعرفش ف بقى تانى حلقه لان ابوالفتوح كان مينفعش يتأجل عن 7 مايو لارتباطاته.

بسطويسى: كان فى اتنين معايا رقمهم مسئولين عن حملته .. كلمت الاول قالى كلمينى بعد شويه .. وقعدت يومين بتصل وابعت رسايل وبعدين رد كلمنى بشكل سخيف ونهى المكالمه ب جملة مش عيزين وقفل!! كلمت التانى اللى معايا رقمه قالى انا مشيت مالحمله لكن ح اساعدك لان المستشار راجل محترم ومحبش ده يحصل ف حملته ولما تكلميه ح يهتم.. وادانى كمان رقم ابن بسطويسى .. كلمت المستشار كان موبايله قافل كلمت ابنه رد حكيتله الموقف اعتذر لى وبعدها ب نص ساعة لقيت المستشار بيكلمنى بيعتذر لى وقالى حكلمك بكرة م المكتب تكون المواعيد قدامى وفعلا كلمنى الاتنين قالى نتقابل الخميس المغرب نسجل ف بيته .. والاربع بليل كلمنى سكرتيره يأكد عليا ويطلب ان نروح العصر بدل المغرب .. وفعلا سجلنا ونزلنا بالحلقة.. برضه مسالنيش حنسال ف ايه ولا طلب حذف حاجه ولا كان له اى طلب وكان انسان لطيف جدا.

خالدعلى: كلمتهم الخميس قالولى كلمينا السبت .. دول مش متطوعين زى ابوالفتوح ولاموظفين زى موسي اللى لفت نظرى انهم اصحابه وهما نشطاء عالتويتر معروفين .. ردوا عليا فمعادهم وقالولى بكرة نبلغك امتى .. تانى يوم اتصلت مردوش بعدها ب اقل من ساعه اتصلوا قالولى الاحد 13 مايو هوا اول ظهور اذاعى .. برضه ولاطلبوا يشوفوا اسئله ولا نمتنع عن اى حاجه .. بين فترة والتانيه كنت بأكد المعاد .. وف يوم الحلقه كان مفروض خالد يوصل لنا قبل الهوا ب ربع ساعه بس كان من الظهر موبايله قافل وصحبه اللى بتابع معاه مخضوض عليه انه اتأخر .. الساعه 4 الا 5 رد خالد كنت بتصل به على موبايله وقالى اتزنقت ف اجتماع مع كذا كذا وكانت فعلا حاجه مهمه اوى .. بس طبعا صوتى كان متوتر ومنهار علشان الحلقه اللى بازت فقلتله طب ناخدك تليفون تقول انك جاى قالى مش بس ح اقول انى جاى انا حبدأ ارد عالاسئله من دلوقت علشان مضيعش الحلقه .. اول ماكلموه هوا اول حاجه عملها انه اعتذر ودى فرقت معايا اوى بعدها لقيته بيقول الاعداد عندكم اكد عليا المعاد بس الغلطه منى .. لما جه قالى انا قلت كده خفت حد يضايقك ويفتكرك مقصرة .. ولما خلصت الحلقه سلم عالكل ولاننا كنا فالحلقه بنتكلم عن خوف الاقباط ف بعد ماخلصنا سلم على مذيع مسيحي صاحبنا قام طبطب عليه وقاله يا حنعيش ف مصر سوا يا نموت سوا محدش حيطلع منها ولا حنفترق .. صحيح خالد كان جاى بعربية واحد صحبه

الحريرى: كلمتهم الخميس قالوا لى الاحد .. الاحد كان معادى اتحدد ان الحلقه هوا السبت 12 مايو .. ولا اتطلب منى يعرفوا اسئله ولامحاور .. المعاد بتاع الهوا وصل فيه بالضبط .. رده كان صريح بشكل مبهر .. كنت انا والمذيعات للى يشوف الصور بتاعة الحلقه يلاقينا ف حاله تركيز وسعادة بجد .. قد كده الراجل ده فاهم وبيحب بلده .. الحريرى لو معاه امكانيات وحواليه ناس متخصصه انا واثقه انه كان حيبقى منافس قوى اوى .. بجد الحلقة كانت من اسهل وابسط حلقات حياتي.

صباحى: كلمت سلمى بنته وصلتنى بالمسؤله عن تنسيق المواعيد ف حملته (....) كلمتها قالتلى كلمينى بعد يومين .. اتكلمت بعد يومين مردتش لاعلى مكالمات ولا تليفونات .. استنيت يومين وكلمت سلمى بلغتها اعتذرت لى ان مش ب ايدها حاجه لان المواعيد بس مع (...) فقلتلها بلغيها ان كده مش صح .. شويه وكلمتنى المسؤله عن المواعيد تعتذر لى ان مقدرتش تضبط معاد ف احرجت ترد .. حجه معجبتنيش بس اللى لحق الموقف ان حمدين حواليه اصحاب عاشقين له بشكل غريب وده اللى خلى د/محمدالعدل يضبطلى جدول حمدين ويساعده خالديوسف .. متابعتهم واهتمامهم نسانى انهم كانوا متعبين جدا ف تضبيط مواعيدهم هما لما كنت بطلبهم ف لقاء لهم .. المهم المعاد ضبط وكان الخميس 17 مايو هوا .. والساعه 4 وتلت وصل حمدين بعربية د/محمدالعدل اللى كان سايق له (: وكان كتير من زمايلنا فالاذاعه مستنينه .. وبعد الهوا اتصور مع الكل وحاول يعمل كده بسرعه لانه كان وراه معادين بعدنا وكان جت له مكالمه ضايقته شويه وسط الحلقه بس قد كده برضه مرضاش يسيب الناس.

شفيق: كلمت بركة اللى ماسك له حملته مردش يومين .. وصلت للى ماسكه المواعيد ردت وقالتلى جدوله مليان بس حنتابع كل يومين .. كنت بتابع بس علطول حاسه ان الدنيا مقفله لغاية ما رد عليا بركة وقالى ح اضبط انه يجي لك واللى ماسكه مواعيده كلميها دلوقت تضبط لك .. كلمتها قالتلى والله لسه ماعارفه الاقى وقالتلى ح اديك رقم دكتور كذا ده اقرب له تابعى معاه .. كلمت دكتور كذا برضه قالى تابعيينى كل يوم .. وخلانى اكلم الوزير فلان لانه من المنسقين للحمله .. بقيت اتابع مع المدام ومع بركه ومع الدكتور ومع الوزير.. حسيت انى ففيلم الارهاب والكباب لما كان عادل امام مش عارف مين الموظف المسؤل عن طلبه .. فالاخر بدأ الموضوع يضبط ويبان لنا معاد ولقيت الدكتور بيقولى النهارده بليل ممكن يجى يسجل لك قبل مايطلع على برنامج ف مدينة الانتاج جنبكم .. كلمت المدام اللى بتضبط المواعيد قالتلى استحاله ازاى يقولك كده سبينى اضبط معاد تانى .. بعدها بيومين ادتنى معاد وكان حيبقى الاحد 20 مايو بس الصبح لغوا كل مواعيد الهوا لنا ولغيرنا .. الغريبه ان شفيق اكتر واحد حواليه ناس اسمها كبير بجد بس اللى حصل انهم كانوا مش مع بعض وبدل ما تكلم واحد بس وتلاقى الباقيين محترمين للمعاد اللى اتفق معاك عليه تلاقى ان بالعكس .. كلمة حق شفيق ولا حاسس باللى كان بيحصل منهم وشكله لما شفته غلبان عكس غروره عالشاشه .. الدكتور اللى ماسك له شغله اللى كنت بتابع معاه قالى والله هو طيب ادخلى عليه كلميه مش حيكسفك حتى لو تعبان بدل ما اللى ماسكة له مواعيده غلبتك .. سكت وكل اللى فكرت فيه الكلمه اللى كنت بسمعها عن مبارك مشكلته فاللى حواليه .. قلت ياربى مبارك تااانى.

مرسى: الحملة المسؤلة عن ظهوره الاعلامى معمول لها 3 ارقام .. اول ماكلمتهم اخدوا المييل بتاعى قالولى افتحيه حتلاقى ابليكيشن امليها وابعتيهالنا و ح نرد بعد يومين .. بعتها واستنيت اليومين مردوش ف كلمت زميلى فالدفعه اللى مع الجماعه وهو مسؤل ف جريدنهم حكيتله ف خلانى اتابع مع احد سكرتارية د/مرسي قالى هو مشكلته ان علطول فالمحافظات بس خلينا نتابع سوا .. المتابعه كانت من تليفونات الحمله والملفت النظام الرهييييب اللى هما فيه .. يعنى كل مرة يرد عليا حد ف تلقائيا ابدأ اقوله انا فلانه وعيزة كذا الاقيه بيكمل لى كلامى ومسجل كلمتهم امتى ووصلنا لايه .. ويوميا يوصلنى مييل بتحركات د/مرسى .. وبعد فترة قالى يامدام هو مش مهتم بالاعلام لان تركيزه اكتر فالمحافظات بين الناس .. المرشح الوحيد اللى الميديا عنده بعد الشارع .. وكان اخر حل وصلنا له ان اروح له مؤتمر صحفى اسجل معاه وفعلا روحت الخميس 17 علشان انزل بالحلقه الاحد 20 لكن لظرف خاص الخلقه منزلتش .. صحيح د/مرسي مش الشخصيه اللى تقدر تحكم عليها كشخص منفرد .. لما روحت اسأله ف حاجه رد بدون ترحيب قالى اللى تعوزيه بلغى به المسؤلين عن الميديا الاول وهما يقولوا لى .. هو مثال متجسد للانسان اللى عبارة عن ترس ف ماكينه كبيرة كلهم بيكملوا بعض بجد.




يسمح بنقل أو استخدام المواد المنشورة بشرط ذكر المصدر أي نوع من التعدي يعرض صاحبه للمسائلة القانونية
حدث خطأ في هذه الأداة