من: فيس بوك
كابتن
كابتن خد بس احكيلك حكاية ظريفة جداً.
سين
سؤال: هو قبل ما يكون فيه ثورة كان كل الشعب عارف الجيش يميل ناحية اية ؟؟ هو مش
كلنا كنا عارفين ان الجيش ضد التوريث وان سامى عنان هو خليفة مبارك واللى كبرت
الحكاية دى فى دماغ مبارك هى سوزى .. وبالعقل كدة .. لما يكون اللى فات .. احمر ،
احمر ، احمر .. متوقع اللى بعديهم هيكون اية يعنى ؟ اكيد مش ازرق مثلاً .. البلد
عزبة ابوهم اكيد جى احمر .. الأحمر اللى كان شعب مصر كله عارفه هو سامى عنان.
طيب
فى حالة ان الهانم اصرت تورث لجيمى كان هيبقى اية الوضع ؟ هل هيصطدم الجيش بحسحس
مثلا ويقف قدامه ؟ الإجابة : لأ ... بس كانت هناك خطة لإفشال الرئيس النايتى جمال
مبارك ، فى خلال سنة .. كل اراجوزات الإعلام تبعيتهم للمخابرات العامة والحربية ..
كلهم هيشلفطوة فى خلال سنة وبعدها يقوم قيادات بعزله ويبقى حققت ارادة الشعب
وسلامات يا شعب .. البعد العسكرى هنا فى ان جمال مبارك ( مش منهم ) .. أيوة هو دى
طريقة التفكير بتاعة العسكر .. لو انت مش عسكرى تبقى درجة تانية ومينفعش تكون رئيس
لواحد عسكرى تبقى عيبة فى حقهم.. فى حالة ان جيمى كان رئيس كان مصالح القادة فى
الجيش الحرامية والهليبة كانت هتستمر واكتر كمان.. الدولة دى اللى بيحكمها من
وراء الستارة هم قادة الجيش فى الاساس.. شوية الألاضيش والموظفين الكبار امثال
اعضاء مجلس الشعب والوزراء ورئيس الوزراء ورئيس الجمهورية نفسه.. مجرد مراية. غطاء
للحكم العسكرى المريض.. كل حاجة كانت بتحصل بمزاجهم.
وهنا احب استشهد بمكالمة
عبلة زوجة احمد عز مع عمرو اديب لما قالها ان انتى السبب انتى وجوزك ورجال اعمال
مبارك فى ان الريحة تفوح اوى ما كنا عايشين كويسين جه جوزك فضح الدنيا .. المكالمة
دى فضلا عن كونها بتثبت انه كلب مخابرات الا ان البعد الكبير فيها واضح ان
الألاضيش اللى قيادات الجيش جابتهم كمراية للحكم من الظاهر أساءوا استخدام السلطة
وفتحوا على العسكر ابواب الجحيم.. بعد ما كانت البلد دى متقسمة الى عدة دويلات ..
دولة العسكر ... دولة القضاء .. دولة الكنيسة .. دولة رجال الأعمال .. دولة
الداخلية ، وفيه شوية ناس حوالى 90 مليون بيتدعكوا فى دولة " الملاطيش "
اللى بيتنفذ عليهم القانون اللى هنلجمهم بيه زى الحيوانات.
واتفتحت
أبواب الجحيم عليهم.. وهى الثورة.. جاءت كرصاصة الرحمة للعسكر.. وفرت عليهم
سنة كاملة شغل ضد جمال مبارك.. وانتهى مشروع التوريث يا ولاد.. شالوا راس النظام
وأبقوا على النظام بالكامل لانهم فى الأساس هما النظام.. هما اللى بيحكموا فى
الخفاء.. (الله يمسيك بالخير يا أبو إسماعيل)
ها.. ايه رأيكم فى سامى عنان يا
ولاد؟.. يسقط يسقط حكم العسكر ؟؟ ليه بس يابنى انت وهو دة عسكر عسكر زى السكر؟
.. احنا فى دولة مش فى معسكر!!! ..
كان
حلم ثوار يناير ان كل الدويلات السابق ذكرها تنصهر فى الوطن ( مصر ) ونحلم بعدالة
اجتماعية وتقدم ورخاء وكرامة انسانية ..
طيب
.. نيجى بقى للنقطة الاهم
معلش
سؤال رخم كدة:
هو
العسكر ارتكبوا جرائم بعد التحية العسكرية لشهداء يناير كام مرة ؟ كتير مش كدة . .
فى حق مين يا ترى .. ياة .. كتير اوى .. ثوار .. 6 ابريل .. اشتراكيين .. اسلاميين
.. حازمون .. نصارى .. اولتراس .. كتير كتير .. كلمة يسقط يسقط حكم العسكر كانت
على كل جدار بيت تقريباً. وهنا يكمن فشل القيادات امثال طنطاوى وعنان فى احتواء
الوضع .. مش عارفين يحلحلوا الهجوم الشديد عليهم ... وطبقاً لتسريبات رصد كان
السيسى بيتكلم عن ان القوات المسلحة تمت اهانتها اهانات شديدة على الملأ من
الإعلام كمان وان الوضع بعد الثورة منفجر ويصعب السيطرة عليه معدش ينفع زى زمان
يبقى العسكر خط احمر دلوقتى كله بيقول رأيه .. مكنش ينفع بقى ان واحد زى طنطاوى
وعنان دول يقولوا للثوار .. روح لامك ياد منك ليه مفيش ثورة احنا هنستولى على
الحكم قدرة واقتدار .. كانت هتبقى واضحة اوى انهم حرامية للعيان .. فى حين انهم
اساتذة فى سرقة مقدرات الشعب المصرى فى الخفاء بدون ما يحس الغلابة وولاد العبيطة
بتوع تسلم الايادى دلوقتى .. وبصراحة اللى يلاقى دلع وميتدلعش يبقى ابن فقرية ..
وجاءت
الخطة ( أ ) :الخطة دى لها ابعاد وخطوات مدروسة .. احنا هناخد الديموقراطية سلم يا
كماحة .. هيكون فيه منافسة شريفة يا ولاد .. انزلوا الإنتخابات .. كله يرشح نفسه ..
وبالمرة علشان نحسسكم بالمسرحية الهزلية سعد الصغير كمان يرشح نفسه هو والقادر
الفاجر وشوية غجر مزقوقين علشان الناس تحس بمهانة منصب رئيس الجمهورية ...
وفتحوا
الباب للإنتخابات والعسكر هيسلم السلطة ، لا بجد حقيقى ؟ لا العسكر هينقلبوا
وهيصدروا الطرشة .. الشغل الشاغل للشارع المصرى هل العسكر هيطلعوا رجالة ويسلموا
الشعب ارادته واختياره ولا هيطلعوا ولاد مرة حرامية .. طبعا التانية هتبقى مكشوفة
اوى ومفضوحة ..
خلاص
.. ننزل بمرشحنا الهمام .. يبقى مراية جديدة لينا بدل اللى إنكسرت ( مبارك ) .. مين
يا ترى مين يا ترى .. آة .. مفيش غير السكرى إياه .. إية ؟؟ بتتكلموا بجد .. ؟! طب
اختاروا بضمير هاتوا راجل فايق وبيعرف يوزن كلامه .. لالالا مش مهم اى طرطور
والسلام واللى نعرفة احسن من اللى منعرفوش .. طيب دة مش هينجح دة عبيط جدا .. يبنى
قولتلك مش مهم احنا عاملين حسابنا ... عاملين حسابكم ازاى يعنى .. انا اقولك .. بقى
يا سيدى القوتين الوحيدتين فى الشارع السياسى الآن هما الاخوان والفلول .. الناس
الوحيدة اللى تقدر تحشد ولها قواعد شعبية عكس اى كيانات ثورية جديدة لسة عليها وقت
لما تتشكل وتنتشر فى الشارع المصرى .. فاللى هننزل بيه هو اللى كل الناس هتروح
وراة حتى لو كان ساقط اعدادية .. ياراجل يعنى انت عاوز تقولى انكم بتدعموا الفلول
؟ تصدق زعلتنى منك ! .. يبنى اساسا احنا الفلول متفتح مخك معايا امال ..
مشهد
: مصطفى بكرى بيحلل مع عمرو اديب ميول الشارع المصرى للرئيس القادم وعمرو مخنوق
وودانة حمرا الشارع يا ترى يا مصطفى بيه مع مين ؟ يعنى مين اللى هيكسب فى
الإنتخابات الرئاسية . ؟ .. بقرى : انا اقولك حازم ابو اسماعيل .. هو فيه حد غيره ..
شعبية منتشرة .. عمرو اديب .. احنا فى خطر وقلقان على مصر ومستقبلها ازاى القوات
المشلحة تقبل بواحد زى دة انه يبقى رئيس !
حـ
الصول بيتفرج على البوقين دول .. اة فعلا ازاى هيمسكنا واحد بدقن وعاوز يحاكم
القيادات الفاسدة فى الجيش والمتورطين فى قتل المتظاهرين دول المفروض اصنام
بنعبدهم من دون الله لا مساس ولا اية النظام ؟ اللهو الخفى : إتقل تاخد حاجة نضيفة
..
ظابط
بمكتب المخابرات: وبعدين يا جدعان .. البلد هتروح من ايدينا .. هنروح فى داهية .. الراجل
شعبيته بتعلى يوم بعد يوم ... كل اشاعة تطلع عليه تزود شعبيته اكتر .. كنا بنتريق
عليه ونقول عنه انه فشلة وتخين طلع انشط مرشح رئاسى فى مصر ولف مصر كلها كعب داير ..
طيب النصارى ضده اكيد .. اية دة دول حضروا مؤتمراته وايدوه .. دة فيه نصارى كتير
فى حملته .. الإحصائيات بتقول ان الراجل دة هياخدها اكتساح . فضلاً عن ميول الكثير
من الاخوان للراجل لانه بيتكلم بلسان حسن البنا تقريبا ، وبيقول علينا هؤلاء ذئاب
وثعالب والناس مصدقاة .. احنا هيتعمل معانا الجلاشة عن قريب ... اللهو الخفى : إتقل
تاخد حاجة نضيفة ..
احنا
ننزل بالجوكر بتاعنا .. عمر سليمان .. الورقة اللى مرعوبين منها .. قوم إية يا
مؤمن حصل خطأ فى العد للتوكيلات بتاعته بدل من 30 الف اصبحوا 29200 تقريباً .. وياعينى
مكنش فيه وقت عمر سليمان يقدر يجمع فيه الورق الناقص دة ، والشعب العبيط مصدق .. الجوكر
بتاعنا هياخد الإثنين الكبار معاه . حازم والشاطر .. بطريقة شيك وسلسة وبكدة النار
تتطفىء والدخان يختفى فى خلال ايام ..
وبقدرة
قادر اللجنة العليا للإنتخابات الرئاسية - اللى هى فى الاصل لجنة ادارية مشكلة من
قضاة .. بقدرة قادر يا مؤمن ويامؤمنة .. تتحول للجنة قضائية وكانها محكمة منفصلة
وبتحكم وبتطلع قرارات من نفسها .. وملهاش علاقة بمؤسسات الدولة .. مبتعترفش باى
حجية قضائية ولا احكام ولا نيلة ... احنا جالنا ورق بيقول ان ابو اسماعيل امه امريكانية
واخدنا قرار استبعاده .. طيب الورق دة ابو اسماعيل خد نسخة منه وقدمه قدام المحكمة
والمحكمة اهانت الورق دة وقالت انه لا يعتد به مستند رسمى وفيه طمس وشطب والمحكمة
إذ تطرحه ارضاً ( أى محامى هيفهم معنى الكلمتين دول فى منطوق الحكم ) .. بعد كل دة
التزمى بقى يا لجنة يا ادارية بحكم المحكمة ... لا اصل احنا جاتلنا ورقة جديدة
بتفيد انه امة امريكانية .. طيب العقل بيقول انك تستأنفى قدام القضاء وتاخدى جلسة
مستعجلة تقدمى المستند الخطير دة وتكسبى الاستئناف وتطلعى تشردى حازم فى الفضائيات
.. لالا مش مهم الشعب عبيط وفاكر اننا قضاة وهيئة محكمة بحق وحقيقى واحنا متحصنين
وابوها راضى وانا راضى مالك انت ومالنا يا حازم ... طيب يا عم المتخلف انت ازاى
توافق على كدة دة غير قانونى يعنى ينفع اقدم لك شهادة الجيش بتاعتى وانت تقول انى
مدخلتش الجيش فى الأصل مش المفروض اللجنة دى مرتبطة بمؤسسات الدولة يعنى ولا هو
الموضوع متكوس .. الشاب الثورى الكيوت .. اة انا موافق اصل انا مش بحب حازم دة طيب
انت مش بتحب حازم يا حيلتها تظلمة ليه وتتعدى عليه وعلى امه بدون وجه حق هى الثورة
علمتك كدة اشكال وسخة صحيح !..
اية
دة إلحق هو الشاطر نزل ليه صحيح .. إخوان كاذبون .. إخوان مش عارف اية ... وذات
مومنت لما تعرف ان الميول لحازم كانت كبيرة داخل الجماعة لولا ان فيه حد من اللجنة
العليا للانتخابات قالهم ان هيحصل مؤامرة على حازم وهيستبعدوه بدعوى ان امه
امريكانية والحقوا وبتاع ... يقوموا الاخوان يلاعبوا العسكر بنزول الشاطر .. يقوم
العسكر تقلان ونازل بالورقة الاخيرة .. الجوكر .. عمر سليمان .. بعدها يجيلهم خبر
انه هيتم استبعاد الشاطر علشان قضيته حتى لو كان واخد رد اعتبار واعفاء ... مش مهم
المهم انه يطير ...
المتخلفين
بقى من الثوار اللى ربنا ابتلانا بيهم قعدوا يعيطوا .. اخوان كاذبون .. اخوان مش
عارف اية .. طيب يا عم الدكر ماحنا قولنا ان مفيش غير كتلتين فى ام الشارع لو
منزلش مرشح الاخوان قدام شفيق مين اللى هيلعب لعبة الحشد ضدهم غير الاخوان ؟
المهم
نزل مرسى .. الإستبن بتاع الإستبن (الشاطر)..
ورينا
همتك بقى يا سيادة اللواء .. محمد شفيق .. مين محمد شفيق دة اخو على جمعة .؟ لآ ..
دة اخو احمد شفيق سيادتك .. مدير مكتب المخابرات العامة .. معلومة جديدة صح .. ومش
بس كدة دة عمل غرفة عمليات مركزية بث الشائعات على مرسى .. الحق دة شاذ جنسياً. ..
الحق دة فيه حاجة فى مخه .. لدرجة انهم قالوا عنه انه زمالكاوى على جريدة الوطن
وان البلد مينفعش يمكسها واحد زمالكاوى !! وراحت جهات سيادية للعمد والقرى تهددهم
لو اخترتم مرسى هيحصل فيكم وفيكم ووووالخ!!
وجاءت
الانتخابات وكسب مرسى بالعافية والفضل يرجع لربنا ثم ( لرصد ) أيوة كانت سبب من
الاسباب فى احراج العسكر فى شل ايدهم من التزوير .. وشفيق خسر بعد ما كل الدولة
تضامنت واشتغلت له .. الخطة أ فشلت .. يا شماتة أبلة ظاظا فيا !!
سؤال
رفيع .. بعد العداء الشديد للعسكر فى عهد طنطاوى وعنان كانوا يقدروا ينقلبوا على
مرسى ؟؟ الإجابة : كانت هتبقى مفضوحة اوى ومكشوفة للناس كلها انهم طمعوا فى السلطة
ومكسوا مرسى الهوا !!
طيب
الحل اية .. الحل فى تجديد الدماء .. اصبحوا كروت محروقة خلاص .. اية دة يعنى احنا
هنستغنى عن سامى عنان وطنطاوى ؟!!! مؤقتاً بس لحد ما الجو يهدى شوية .. وبعدين
هيرجعوا تانى ..
الخطة
( ب ) كالآتى : احنا هنعمل الجلاشة مع مرسى وهنلبسة الطعم الظريف .. الحق يا مرسى
دة عنان وطنطاوى كانتوا بيتأمروا عليه .. انا خدامك المطيع .. انا مبسوط منك يا
سيسى .. انت هتبقى وزير الدفاع .. بعد شوية السيسى بطل .. السيسى اخوان .. الاخوان
بغباؤهم السياسى يشاركوا فى صناعة مجد للسيسى .. السيسى بطل خلاص .. تمام حلو اوى ..
فاكرين خطة إفشال جيمى ؟ تبقى فى ايدك وتكون لغيرك .. مش مكتوبالك يا جيمى .. وكانت
من نصيب مرسى .. واتعمل الانقلاب الناعم بالغطاء الشعبى الظريف بالكريم شانتيه ..
وبعدين
؟ انت اللى هتبقى الريس !! .. انت ناسى اننا فى المؤسسة العسكرية ماشيين بالاقدمية
.. انت المراية يا عنان .. ومكتوبالك الرئاسة اللى بتحلم بيها من قبل الثورة .. مكانك
محفوظ .. وعلشان البقر تصدق هنعمل انك ضد السيسى فى حين ان انت وهو موظفين كبار
عند مارتن ديمبسى ( رئيس اركان الجيش الامريكى ) .. هنطلع السكران يؤيد عنان .. وفريد
الديب يشتم فى السيسى وحكومة الانقلاب .. واسفين ياريس مع عنان .. وسامح ابو
العرايس بيعرى السيسى وافتكر دلوقتى حالا ان حصلت مذابح فى عهده ( الإنسانية بتشر
من دم امك ياد ) .. اية دة .. هو اية اللى بيحصل ؟؟
اللى
بيحصل ان .. الأوامر صدرت ! .... أكشن .. كله يبتدى
اعلام
.. جرايد .. انزل بصورة عنان يبنى وهو بيقرأ الجرنال
ووزع
كل الورق دة على مقدمين البرامج والمتصلين والضيوف
المسرحية
مجاناً والدعوى مفتوحة للجميع للإستمتاع باغتصاب الوطن
طب
والسيسي؟ ماله.. الرئاسة يعنى ..؟ هو فيه حد وزير دفاع يقبل يقلع بدلة ميرى
ويلبس المدنى علشان يتلقى سهام المعارضة والناس تضايقة ؟ ليه ماهو مزاجة زى الفل
وهو فى مكان احسن من رئيس الجمهورية والدستور الجديد هيتعمل معاه الواجب فيه طيب
هو محتاج اية تانى ..
الخلاصة
.. طالما اللى قبليه .. أحمر ، احمر ، أحمر .. يبقى اكيد اللى جى أحمر
وكأن
ثورة لم تقم ( لامؤاخذة يا برادعى).
احنا
اتعمل معانا الجلاشة
لا
احنا الجلاشة نفسها
اتلعب
بينا الكورة والمخابرات بتشقطنا
ابانا
الذى فى المخابرات ارحم ميتين ابونا كفاية اغتصاب لحد كدة
كفاية
فضفضة لحد كدة .. قوموا اقرأوا سورة الكهف .. جمعة مباركة علينا وعليكم أجمعين ..
..
{وَيَمْكُرُونَ
وَيَمْكُرُ اللَّهُ وَاللَّهُ خَيْرُ الْمَاكِرِينَ} ،
{وَاللَّهُ
مِنْ وَرَائِهِمْ مُحِيطٌ}
يسمح بنقل أو استخدام المواد المنشورة بشرط ذكر المصدر أي نوع من التعدي يعرض صاحبه للمسائلة القانونية
ليست هناك تعليقات:
إرسال تعليق