الأحد، 21 يونيو 2015

عزيزي العربي: افهم يا حمار




المثل المصري معبر جدا: مفيش حد صالح. كله بتاع مصالح. والمعنى إننا في عصر القوة. واللي معاه السلاح يفرض رأيه. والسلاح أهم من الفلوس. ويمكن بالفلوس تقدر تشتري سلاح. عشان كدا الدول القوية بتتحكم في مصير العالم، وتقول دا طيب ودا إرهابي ودا صديق ودا عدو. ومحدش بيراجعها في كلامها. لما تبقى عندك قوة تقدر تحارب بيها الاقوياء تعالى كلمني. لكن طول ما انت ضعيف أو شحات أو خدام يبقى اتنيل واسكت أو غوووور في داهية.

روسيا الدنيا تطلع تنزل هتفضل روسيا. دولة قوية لديها جيش ونووري. وبتعمل اللي هي عايزاه وقت ما تحب. إيران ظلت محظورة عقود، لكنها بقيت قوية وطورت قدراتها القتالية ولذلك يسعى العالم إلى التفاوض معها. كوريا الشمالية دولة فقيرة ضعيفة وتتحدى العالم لأن عندها نووي. فمحدش قادر يعمل لها حاجة. تركيا في ظل أردوغان تحولت إلى نمر اقتصادي قوي والحرب القائمة على أردوغان هدفها تركيعه لتعود تركيا دولة تابعة زي مصر مثلا. السعودية دولة غنية لكن معندهاش جيش ولا قرارها مستقل عن اللي بيحموها. عشان كدا مرتبكة وهتفضل مرتبكة.. إلخ إلخ إلخ

رأيي إن داعش بتعمل اللي عملته أمريكا في العالم. أمريكا استغلت قوتها وسلاحها عشان تحكم العالم. وسرقت وقتلت وحرقت ودمرت دول ومدن ومئات آلاف البشر. وانتهاكات حقوق الانسان اللي عملتها أمريكا تملأ كتب وقنوات. والانتهاكات دي لم تتوقف وربما لن تتوقف. وفضائح هيروشيما ونجازاكي وفييتنام وجوانتانامو وأبو غريب وقصص الاعتقال والتعذيب والقتل اللي عملتها أمريكا على قفا من يشيل. دلوقتي أمريكا عاملة شرطي العالم وبتحاول تصور لكل الدول التابعة ليها إن داعش خطر. طيب مش تركز كدا شوية وتنفي عن نفسك التهمة الأول؟ أمريكا أخطر كتير من داعش. حتى إن داعش متهمة إنها صنيعة أمريكية ودا مش بعيد خالص. داعش بتقلد أمريكا في استخدام القوة للسيطرة. ولا هو حلال لأمريكا وحرام على داعش؟ ولا هو انت مش قادر على الحمار بتتشطر على البردعة؟


طب الحوثيين وحشين. وعايزين يسيطروا على اليمن، اللي هي بالمناسبة بلدهم. مش جايينلها من بره عشان يحتلوها. مش مختلفين. خللي اليمنيين أهل السلاح يقاوموهم. ايه دخل السعودية بقى بالقصة؟ هو مين عينك شرطي المنطقة با ابن عبد العزيز آل سعود؟ وبعدين انت نسيت إنك دعمت المخلوع علي عبد الله صالح سنين طويلة؟ وكنت بتدفع مرتبات موظفين الحكومة اليمنية بتاعته شهريا. حتى لما اتحرق خدته عندك عالجته؟ دلوقتي جاي تكلمني عن شرعية؟ شرعية ايه دي لا مؤاخذة؟ تعرف ايه انت عن الشرعية؟ انت هتستعبط؟

الشيعة خطر على السنة، ما علينا، بس يا ترى خطر الشيعة ولا خطر إسرائيل الصهيونية؟ يا ترى الشيعة مش ممكن يقفوا معانا احنا السنة ضد الصهاينة في حرب مفتوحة لتحرير فلسطين؟ أكيد هيعملو كدا. طب لو انت مصدق إن فيه علاقات طبيعية متواصلة بين الشيعة، وخصوصا إيران وبين إسرائيل، ما تعرفش إن فيه علاقات طبيعية متواصلة بين حكومات دول سنية زي مصر والسعودية والمغرب والأردن والإمارات وغيرها وبين إسرائيل؟ انت أكيد عارف، ولو مش عارف اعرف. اشمعنى عامل فيها عنتر على العلاقات بين إيران واسرائيل وساكت على العلاقات بين مصر والسعودية وإسرائيل؟ دا معظم الدول العربية يا عم الحج خلاص بتتكلم عن إسرائيل كصديق، وبتقول علنا إن العدو هو إيران.





يسمح بنقل أو استخدام المواد المنشورة بشرط ذكر المصدر أي نوع من التعدي يعرض صاحبه للمسائلة القانونية
حدث خطأ في هذه الأداة