الأحد، 11 يناير، 2009

يوميات متفرج على ماتش

ولو إني ماليش في الكورة
تحليل ماتش الأهلي والزمالك

ولو اني ما باحبش الكورة رغم إني أهلاوي قديم
ولو إني من زمان ما قعدتش قدام تليفزيون عشان أتفرج على ماتش
لكن اللي بيحصل في غزة اللي منكد عليه من زمان دفعني للصمود لمدة ساعتين أمام مباراة القمة زي ما بيقولوا عليها بتوع الرياضة
ما أكدبش عليكم كنت متحمس عشان منتظر صواريخ زي ما حثل في ماتش الاهلي والإسماعيلي
وربما كنت متحفز للتشفي في الأمن اللي أعلن استعدادت كبيرة للتحكم في الجماهير
منها التفتيش الذاتي الدقيق وخلع الأحذية واعتقال البعض وبث الكثير من الأمن اللي لابس مدنيين والمخبرين في المدرجات لمعرفة المشاغبين
وكمان الكاميرات اللي اتكلموا عنها في الاستاد
عموما تسمرت مع قافلة كبيرة من الأهلاوية أمام التليفزيون في غرفة قسم الرياضة
أصل الجرنال اتقسم نصين
الزمالكاوية قعدوا في أوضة العربي والدولي وقفلوا عليهم
والأهلاوية قعدوا في غرفة الرياضة متحفزين يجهزون معايرة الزمالكاوية بعد الماتش والفوز كالعادة
رئيس التحرير عمل محايد رغم إنه أهلاوي واستمر في جولات منتظمة بين الغرفتين حرصا على السلم العام داخل الجرنال
المهم مكانش فيه كورة حلوة
هكذا شعرت
وربما المشكلة في لأنني لم أشاهد ماتشات مؤخرا
والكورة بقت كده وأنا ما اعرفش
لكن دي القمة
لما القمة كده
إمال الماتشات التانية إيه
يبدو أن القمة الكروية قررت منافسة القمة العربية في عدم الفعالية
كريم فاروق الهادئ بطبعه كان منزعجا جدا من أمير حارس الأهلي اللي مالوش في حاجة
بينما عبد المنعم فهمي يؤكد أن الواد ماوش فيها بس ربنا واقف معاه
في الجانب الأخر من الجرنال زين وصحابه على العكس تماما مبسوطين من أمير ويعولون عليه الكثير في فرصتهم للفوز
بين الشوطين
عم هاشم المقصد الثاني
والحمام هو المقصد الأول

في الشوط التاني
الإهتمام بالماتش بدأ يقل
اكتشفت إن زين هرب وراح يتفرج في البيت أصلا
خوفا من الفضيحة طبعا ولو إنه متعود على كده
لكنه ظهر فجأة وقال أنا هنا بس عندي شغل مش عارف أركز في الماتش
في غرفة الزمالكاوية أحمد زكي عثمان تصدقوا اسمه كده وطلع زملكاوي
يالله
أهم اخواتنا برضه
معلش أصلي كنت داخل في نفس الوقت في صراع كبير مع الأستاذ عبد الله كمال "روزاليوسف" على الفيس بوك حول "وطنك أهم أم دينك" يعني انته مصر ولا انته مسلم ومسيحي أيهما أهم لك وقولتله إني منوفي وإن المصريين مسلمين ومسيحيين إخواتنا فزعل وفكرني باتريق
المهم نرجع للماتش
بركات جيلبرتو ثبت الميرغني وعدى فتح عن أحمد صديث وحلوة وحلوة وخطيرة وخطيرة
يا نهار أبياااااااااض
مش معقول يا جماعة
الكورة راحت مقشرة لعبد الواحد لكن أحمد زكي قال برافو لعبد الواحد اللي ما اتحركشي من مكانه أصلا
ما علينا
مازلنا في غرفة العربي والدولي قصدي الزمالكاوية
دخل فجأة حاتم وكان واضح إنه زيي مالوش في الكورة
وعندها هتف الجمهور بالروح والدم نفديك يا فلسطين
وبعدها فورا العب يا أهلي
مش عارف ايه الرابط بس ماشي
الماتش فجأة بقى ماتش قمة
وابتعد تماما عن القمم العربية
بس الأهلي كان مالك الكورة طول الوقت وبالتالي أنا مكنتش لاقي حاجة أكتبها لأني في غرفة الزمالكاوية
حاولت
زين من غيظه نط قعد فوق المكتب وربع وبدأ يحرق سجاير
كل الكورة ما تعدي نص ملعب الزمالك يشد نفس ويحبس
التصفيق لعبد الواحد كان مستمر
لأنه الوحيد اللي بيلعب في الزمالك بشهادة أحمد زكي
نوال علي هاجمتني عشان قاعد مع الزمالكاوية
وأميرة هشام قالت من علي الباب زمالكاوية ما تقلقوش
شيما منسي صاحبة الصوت العالي دخلت وخرجت محدش شعر بيها
لا صوت يعلو على صوت المعركة قصدي الماتش
الماتش بتاع الأهلي
كانت جملة حاسمة من أحد الزمالكاوية
قررت بعدها الإنتقال للمعسكر الأخر
في غرفة الرياضة في الطرف الأخر من الجرنال
الوضع مختلف تماما عند الأهلاوية
العدد قطعا أكبر والتعليقات لا تتوقف
حتى أنا تعبت جدا مش ملاحق عليهم وفيه ناس مش عارف اسمهم ايه؟
ابو تريكة هينزل
أخيرا!!
ولا هيفرق
بقاله أربع ماتشات مالوش دعوة بالكورة
تلك كانت عينة من التعليقات الأهلاوية
زي ما طلع أمير في الشوط الأول مالوش فيها
طلع عبد الواحد في الشوط التاني مجنون لما كان بيتلفت وراه يشوف عدى بالكورة خط الجول ولا لأ

الأهلي بيغير بالجوز
طلع بلال وأحمد حسن ونزل أبو تريكة وبوجيلبان
عاوز يخلص الماتش بقه
حظي إني باتفرج في مودرن
واللواء مدحت شلبي كل شوية يشتم المباراة
لم ترتقي للمستوى المنتظر
خصوصا مع تاريخ الفريقين الكبار
أمير مسك كورة أخيرااااااا
تصفيق حاد
أمير بقه حارس مرمى يا رجالة

في غرفة الزمالكاوية الوضع مختلف تماما

حد غير القناة بقت دريم
بس أنا معرفتش المعلق
قالولي محمود بكر
كنت فاكره مات طلع لسه عايش
قال إن الضربات الركنية كتيرة
بس الراجل خللى الجو نايم قوي
زهقني من الماتش أكتر ما أنا زهقان
لكن فجأة علق على حارسي المرة
أثنى على عبد الواحد وقال غن أمير لم يختبر
وبعدين بدأ يشتم لاعيبة الزمالك بدءا من أيمن عبد العزيز
"تحس كده إن اللاعب معندوش الحلول واقف وتحت رجله الكورة وكل التمريرات اما ضايعة وإما فاول"
"من المباريات الوحشة قوي بين الفرقتين مطب" هكذا وصفها محمود بكر
الدقيقة 35
جوووووووووووووووووووووووووووووووووووووول
جوووووووووووووووووووووووووووووول
فلافيو جاب الجول
ومحمود بكر مش عاجبه طبعا بدأ تاني يشتم لاعبي الزمالك
"المباراة هتشتد والزمالك مش هيرضى بالوضع ده"
"الهدف ده مكرر.. فلافيو جابه قبل كده.. كان لازم المدرب ينبه على لاعيبته ياخدوا بالهم من الكور دي"
زين زعيم الزمالكاوية في الجرنال روح
هرب المرة دي بجد
ما هو متعود كل ماتش يسمع كلام مالوش لازمة كتييير
يبقى يمشي أحسن وبكره الناس تكون نسيت شوية
الأهلاوية بعد زين ما مشي
بدأوا يقسموا كورة في نص الملعب
باصات وتقسيمات وهات وخد
تقولشي برازيل
لكن في المدرجات البوكس بدأ يلم الناس
قال إيه مشاغبين
الأهلى رشحه الأهلاوية لإحراز هدف أخر في الدقائق الأخيرة
بينما محمود بكر أكمل الماتش يتحدث عن المعدين والمخرجين وبتوع التليفونات ورجال الأمن والدكتور أحمد بهجت بتاع دريم ورئيس القناة وكل اللي جه وجاملنا سواء نقط ولا لأ

خلص الماتش
وبدأت التحليلات
ودي بقه ليها قعدة كتابة تانية

مبروك للأهلي
حدث خطأ في هذه الأداة