الفتي في المفتي.. من الأخر: السيسي جاب جاز

بص يا سيدي:

السيسي اللعبة كبرت منه ومعدش قادر يلمها بعد الرافضين للإنقلاب ما غرقوا البلد مسيرات ومظاهرات. اقترح عليه المتنيل هيكل ينزل الناس بتوعه تاني الشارع بحجة تفويضه في مكافحة الإرهاب. اللي هي أصلا يعني شغلانة الجيش اللي بيقبض مرتباته عليها أصلا وبيستمد شرعيته منها.

قووم السيسي طلع عمل الشويتين بتوعه كممثل عاطفي وطالب الناس تنزل الشارع تفوضه في محاربة الارهاب. اللي هو الاعتصامات يعني.. ونزلوا الناس وعملو الفرح ورقص وهيصة وفوضناك واخترناك واتجوزناك إلخ الخ..

قووووم اتصل بيه وزير الدفاع الأمريكي هاجل قاله فكك من الأفلام دي يا سيسي. احنا اللي اخترعنا الحرب على الارهاب أصلا. والهري دا ما ياكلش معانا..

قوووم بعدين جات أشتون قالتله: الكلام بتاع فض الاعتصامات دا تبله وتشرب ميته. والناس اللي نزلت يومين وهتنسى وخلاص.. وهات الطيارة عايزة أقابل مرسي.

قوم السيسي معجبوش الكلام وراح قايل للأسطى ببلاوي يعمل فيلم تفويض الداخلية في فض الاعتصامات، ولاحظ طبعا إختفاء حدوتة الأرهاب اللي اتهزق عليها من أمريكا وأوربا.

قوووم طلعت الست درية أخت أمين الحزب الوطني في دمياط اللي بقت وزير الإعلام قالت إن مجلس الوزراء الببلاوي يفوض الداخلية في فض الإعتصامات وفتح الطرق ومنع العنف، اللي هي أصلا شغلتهم اللي بيقبضوا عليها مرتباتهم من غير تفويض.

قووووم الداخلية قالت للمعتصمين قدامكم مهلة لإخلاء الميادين ومش هنمسك حد منكم لو ساب الإعتصام. وسمعت إنهم هيطلعو للي هيمشي بطاقات كمان.

قوووم المعتصمين قالوله تعالى فض رابعة والنهضة لو دكر وإحنا هنعملك اعتصام في كل ميادين البلد. وعملوا بروفة عند مدينة الانتاج وفي الألف مسكن.

قوووم الداخلية جابت ورا. والسيسي جاب ورا. والبرادعي قال إن الاعتصام مش هيتفض بالقوة. والشيخ حسان "لا أنام" قال إن السيسي وعده إن الإعتصامات مش هتتفض وكدا يعني. هو أصلا عارف كويس إنه ما يقدرش يفض اعتصام بالحجم دا من غير دم يغرقه من ساسه لراسه ويخليه مجرم حرب مطلوب في كل محاكم الدنيا.

قوووم ايه بقى.. اللعبة دلوقتي بقت على المكشوف وفضيحة السيسي بقت بجلاجل ومعدش عارف يعمل ايه. حتى اعترف إنه زعلان إن أوباما ما كلموش من يوم الإنقلاب وسايب هاجل يكلمه كل يوم. رغم إن دا الطبيعي لأن هاجل وزير دفاع زيه يعني.

يعني لا الارهاب نافع ولا التفويض نافع ولا الإعلام نافع ولا الإشاعات نافعة ولا السلاح نافع ولا جهاد النكاح ولا الكورة الأرضية ولا اغمز بس بعينك واحنا ملك يمينك.

طب وبعدين؟؟؟؟

الحل دلوقتي حاجة من اتنين: السيسي ومرسي يروحوا يقضوا المعاش في جزر الكاريبي ومنشوفش وشهم الاتنين تاني.. أو واحد منهم يموت وأنصاره يخلصوا على أنصار التاني. أو الحرب الأهلية تقوم والبلد دي كلها تروح في داهية.. أو نستورد حد من المريخ يحكم البلد ونرمي كل دول في الزبالة.

بس كدا أربع حلول مش اتنين..

يا عم ما تاخدش في بالك: يعني هم اللي نزلوا يوم 30 يونيو كانو تلاتين مليون؟  ولا يكونش الإخوان هم سبب سقوط الأندلس؟!

يسمح بنقل أو استخدام المواد المنشورة بشرط ذكر المصدر أي نوع من التعدي يعرض صاحبه للمسائلة القانونية