 |
| السيسي إلى جوار تشاك هيجل وزير الدفاع الأمريكي |
الجهل مستمر.. وناس كتير عمالة تقول نقاطع أمريكا ونقاطع أوربا وهجص كتير من دا وكأننا عايشين في كوكب البلا لا..
بص يا أمور:
أمريكا بتدفعلك سنويا 2 مليار دولار معونة. غير إن تسليح جيشك كله وقطع غياره أمريكي. وأوروبا بيوصلك منها معونات ومساعدات مدنية تقريبا 2 مليار دولار أيضا. خصوصا من فرنسا وألمانيا.
وعندك دين يتجاوز 30 مليار دولار للخارج وفيه فوايد سنوية تحتاج للتفاوض حول تخفيضها ومواعيد دفعها.. وعندك أزمة اقتصادية طاحنة منذ الإطاحة بمبارك وتوقف الاستثمار والسياحة تحتاج فورا لقرض صندوق النقد الدولي. الذي يتحكم فيه أمريكا وأوربا.
وقرض صندوق النقد يسهل عليك الحصول على منح وصفقات تجارية من كل دول العالم لأنه بمثابة خطاب ضمان للإقتصاد المصري.. يعني بروح أمك ما تعملش فيها بطل بالأونطة وتقوللي استقلالية وبتاع.. انت ملتزم بالتعامل معاهم وارضاءهم عشان ليك عندهم مصالح مباشرة.. بالبلدي كدا بفلوسهم...
الأهم بقى: مصر تنفق سنويا من مخزون النقد الإحتياطي مليار ونصف المليار دولار. اللي هو دلوقتي 12 مليار فقط.. يعني هتفلس في حدود 3 سنين بالكتير عشان فيهم ديون وفوايد. وحكومة الببلاوي العرة اقترضت دين داخلي في أول شهر شغل ليها قيمته 81 مليار جنيه من غير غطاء مالي أصلا.. ومخزون الوقود بتاعك يكفي فقط 3 شهور وبدأ النهاردة التفاوض مع قطر على صفقة غاز. ومخزون القمح بتاعك هيكفيك كمان 6 شهور بالكتير..
يعني كلها شهر وتبدأ أزمة بنزين وسولار وغاز حقيقية مش مصطنعة زي اللي كانت أيام مرسي. وكلها 3 شهور وما تلاقيش عيش للأكل.. أما الفلوس السعودي والإماراتي اللي جت فدي اتصرفت على الداخلية. سلاح وقنابل غاز عشان التخلص نهائيا من الاخوان. والكويت تراجعت عن المنحة اللي قالت عليها بضغوط داخلية. والسعودية بعد هوجة "الراتب ما يكفي" مش هتقدر تديك ولا ريال تاني.
عاوز تعيش الدور وتقول ناكل من عرق جبينا ونشتغل وبتاع أقولك: الاحصائية الرسمية للعامل والموظف المصري تؤكد أنه يعمل 27 دقيقة في اليوم.. ياريت تشتغل يا حيلتها.
عاوز تعيش مرحلة الصناعة الوطنية أقولك وماله بس احنا دلوقتي مزنوقين وبنتكلم على شهور.. والصناعة الوطنية الميتة محتاجة من 5 إلى 7 سنين لتدشينها مجددا. ومش هنستحمل الوقت دا أبدا خصوصا مع بقاء الوضع السياسي كما هو الأن مسدود بما يعني غياب الاستثمار والسياحة.
لازم كمان أقولك إن النهاردة مجموعة من الشركات العالمية وقفت شغلها في مصر نهائيا ومنها جنرال موتورز للسيارات اللي قفلت مصنع مصر. وشركة "شل" للبترول اللي قفلت مكاتب مصر وغيرها.
هتفكر تشد الحزام تبقى جدع لو عرفت.. بس هاقولك كمان إن شد الحزام يعني فرض ضرائب تصاعدية على الدخل ورفع الدعم عن الوقود فيما يخص المصانع الكبرى، ودا هيجنن البهوات الكبار اللي عندهم استعداد يولعوا البلد كلها بس محدش ييجي ناحية فلوسهم ومصالحهم.
يعني السيسي يسير بمصر إلى أوسخ أيامها اقتصاديا... عاوز تفهم افهم.. عاوز تفضل حمار براحتك.. بس حل عن دماغنا. أو بمعنى أصح غور في داهية.
يسمح بنقل أو استخدام المواد المنشورة بشرط ذكر المصدر أي نوع من التعدي يعرض صاحبه للمسائلة القانونية
اخي تعليقك من أروع ما رأيت من تحليل مبسط ومقنع مشكور
ردحذفالمهم البهايم تفهم ...
ردحذففي ناس كانت فاكراها هاتزهزه بعد الانقلاب هههههههه زهزهت بس مع الشرطة والجيش والبلطجية
ردحذفعلى قولت سعيد صالح بلاش فشخرة
ردحذفوالله طالما حضرتك علامةوفاهم اوى كده ماشاء الله عليك
ردحذفياريتك زي ما استحمرت الناس كده فى اخر سطر بعد ما كنت ماشي بادب وبتعرض المشكلة كويس
كنت اتمني بعد ما فجرت المشكلة فى وشنا وبعد عرضها المبسط ده ولان واضح ان حضرتك نابغة
انك تتحفنا بالحلول وازاى نعدي المصيبة دي ... والا لحد كده انت عملت اللى عليييييييييك !!!!
بما ان الحكومة الحالية من الفها الي باءها بتشر جهل وتخلف وبما ان الانقلابيين الشرطيين والعسكريين من الفهم الي باءهم منقوعين في جهل وغباء وبما انه علي ما اعتقد انه جزء من منظومة الحروف الابجدية دي للشعب المصري يعرف ذلك .يعني مش داخل جوة منظومة التخلف والجهل المشتركة فيها الشرطة والعسكر والحكومة فمعظم الشعب يري وبوضوح الحقيقة ويعرف هو عاوز ايه..طيب ليه حالنا كشعب وكبلد ومش اي بلد مع هذه الحكومة ومع الشرطيين والعسكريين دول وصل لكده؟ ياريت تقولي الله يريح قلبك
ردحذف