السبت، 28 سبتمبر 2013

انفراد.... النص الكامل لمكالمة الرئيس الأمريكي أوباما والرئيس الإيراني روحاني





خاص:

أوباما: ألووو..  صباحو يا أبو علي
روحاني: احنا بالليل يا ابو حسين. مساء
أوباما: يا أخي ولا مرة أخدت بالي من فرق التوقيت بينا
روحاني: بكره تتعود.. مهي أول مكالمة
أوباما: على رأيك.. كله بالحنية بيلين
روحاني: بيلين دي الست اللي اسمها سارة اللي سقطت في الانتخابات؟
أوباما: هههههه. دا انت مركز بقى في الانتخابات بتاعتنا يا أبو علي؟ بيلين يعني يبقى لين مش سارة بيلين
روحاني: انت فاكرني جاي من ورا الجاموسة يا أبو حسين؟ أنا باعرف 5 لغات
أوباما: يا جدع باهزر معاك.. انت بتقفش ليه بس!
روحاني: مش باقفش ولا حاجة.. بس أنا هزاري كدا
أوباما: الشباب عندي كانو بيرتبو إننا نتقابل وانت في الأمم المتحدة بس انت خلعت
روحاني: مش خلعت ولا حاجة بس كان عندي مصلحة مستعجلة كدا
أوباما: عمرك أطول من عمري.. على سيرة المصالح.. عاوزين نعمل مصلحة مستعجلة.. انت عارف إن شعبيتي في الأرض والمالية تعبانة
روحاني: مهو من عمايلك السودة
أوباما: يا جدع خليك لطيف بقى.. بأقولك نعمل مصلحة مع بعض.. سبوبة يعني
روحاني: هو انتو بييجي من وراكو سبابيب؟
أوباما: بص.. أنا سايبكم واخدين راحتكم في العراق على الأخر. سيبني بقى أسترزق من سوريا
روحاني: واخدين راحتنا ايه؟ انتو حلبتو العراق ومخليتوش فيها حاجة أصلا
أوباما: مش أنا والله دا بوش الله يحرقه
روحاني: انت هتستعبط؟ ما انت مكمل البلاوي اللي الزفت بوش بدأها
أوباما: خلاص.. نبتدي من جديد. وينوبك من الحظ جانب
روحاني: بس موضوع سوريا فيه كلام كتير
أوباما: مش هنختلف يا أبو علي
روحاني: طب والصين؟
أوباما: أنا هضبط وانت ايدك معايا
روحاني: ماشي. بس روسيا هتفقس الموضوع ويمكن تعملنا بوليكة
أوباما: لا لا متخافش. بوتين عنده علم بالمصلحة وهيدوس معانا
روحاني: إذا كان كدا ماشي
أوباما: انت بس خف ايدك شوية اليومين الجايين لغاية ما نضبط المنطقة
روحاني: قصدك مين؟
أوباما: انت فاهم يا أبو علي.. الجماعة بتوع الخليج
روحاني: خليج مين دول؟ انت أصلا لو شيلت ايدك من الليلة دي أنا أخلصها في ساعة وميبقاش فيه بتوع خليج أصلا
أوباما: الطمع يقل ما جمع يا أبو علي
روحاني: دا مش طمع.. أنا عارفهم كويس وعارف ديتهم
أوباما: فاهم. فاهم.. بس كله هييجي بالحنية. بلاش تنشف دماغك
روحاني: وراس الإمام ما ياخدو في ايدي غلوة كلهم
أوباما: وبعدين بقى!!.. عاوزين نخلص في السبوبة مش نفتح علينا فواتيح
روحاني: ماشي ماشي
أوباما: ميشيل بتنادي علي عشان حطت الأكل.. أنا هاروح دلوقتي وبينا اتصال تاني قريب
روحاني: ماشي. بس أنا مش هاتنازل عن خمسين في المية
أوباما: هنبدأ الطمع بقى!!
روحاني: بين البايع والشاري يفتح الله
أوباما: هدي أعصابك بس.. مش هنختلف بعون الله
روحاني: أنا كلمتي واحدة
أوباما: يا عم ما تبقاش حنبلي أومال
روحاني: انت شكلك بتخلع.. هي ميشيل طابخة ايه؟
أوباما: مش عارف.. بس احنا أخر الشهر وشكلها عاملة بواقي أكل الشهر من التلاجة
روحاني: طيب روح كُل.. وفكر في اللي قولتهولك
أوباما: ما تيجي على أول الشهر بعد ما أقبض أعزمك على الغدا ونخلص في الليلة دي
روحاني: لما ييجي أول الشهر يحلها ربنا
أوباما: طب يا أبو علي يا أخويا.. أسيبك بألف خير
روحاني: ولو إنه ما يجيش من وراكم خير. بس ماشي
أوباما: ههههههه والنعمة الشريفة انت راجل عسلية
روحاني: وراس الإمام لو لعبت بديلك لأقطعهولك
أوباما: يا عم انت فاكرني كلينتون ولا ايه؟
روحاني: لا مش كلينتون.. كلكم مونيكا
أوباما: الله يحظك يا أبو علي
روحاني: سلام يا ابو حسين

أوباما: سلام يا أبو علي

الصورة من صحيفة "اسرائيل هيوم". والتعليق العربي "متخيل"



يسمح بنقل أو استخدام المواد المنشورة بشرط ذكر المصدر أي نوع من التعدي يعرض صاحبه للمسائلة القانونية

ليست هناك تعليقات:

إرسال تعليق