الاثنين، 27 ديسمبر 2010

إلى شمس الغنية اللبنانية نجوى كرم: شيلي مصر من دماغك بقى


 الست نجوى كرم اللي بيقولوا عليها الفانز بتوعها "شمس الغنية" رايحة جاية تجيب في سيرة مصر وقال ايه المصريين بيكرهوها وفيه ناس مش عاوزاها تغني في مصر خوفا من منافستها ليهم، يا ستي ما تخليكي في أغانيكي ومعجبينك وتنسي إن يكون ليكي جمهور مصري.

في مصر الناس بتسمع كل حاجة واللي عاوز يغني بيغني لانها بلد كبير تقدر تستوعب كل الأنواع والأجناس، وفيها جمهور يتحمل مليون مطرب من كل أنحاء الأرض.. مش هتيجي عليكي يعني عشان المصريين يمنعوكي أو يكرهوكي.
يا ست نجوى ياللي عايشة دور المضطهدة وعمالة تحكي إزاي المصريين بيكرهوكي وإنو فيه حملة اعلامية ضدك.. بطلي بقى لأنه لا فيه حملة ولا دياولو ولو نفسك يكون فيه حملة قولي من الأخر عشان الحكاية مش ناقصة صداع.
 كل يوم تلاقي نجوى تصرح وتصرخ: مش هاغني باللهجة المصرية إلا لو عمرو دياب غنى باللبنانية.. وأنا معتزة بلهجة بلادي ولن أغيرها.. طب هو حد قالك غني مصري؟ ولا هي تلاكيك.
يا ستي دا الغناء فن والفن بلا جنسية وبلا لهجات والمطرب يبحث عن الكلمة الحلوة ليغنيها حتى لو كانت بلغة البط مع احترامي ليكي.
اللي يخليك مخنوق بقى إن شوية صحفيين كدا وكدا كل ما يشوفوا نجوى في حفلة أو مؤتمر صحفي أو حتى بتعمل شوبنج يسألوها ايه حكاية مصر؟.. فتروح الست نجوى من غير تفكير تكرر نفس الكلام.
أنا مضطهدة في مصر ومش هاغني مصري إلا لو الست أم كلثوم غنت لبناني.. يوووووه
تحس كدا إنها محروق دمها إنها مش مشهورة في مصر زي لبنانيات تانيين بيغنوا باللهجة المصرية منهم نانسي واليسا وهيفاء
وفي مؤتمر صحفي كدا من يومين قالت إنو فيه طابو خامس بيحاول يفسد علاقتها بالجمهور المصري.. أي والله قالت طابو خامس، أو هكذا نقل عنها بيان المؤتمر الرسمي.. مش عايزين برضه نظلمها أو نضطهدها.. هي مش ناقصة
طبعا أنا بقيت ضمن الطابور الخامس دا بعد اللي كتبته دا، ويمكن ساعتها يبقى الطابور سادس، بس عموما ما علينا
كلمة لله في النهاية.. يا ست نجوى كرم، يا شمس الغنية اللبنانية: سيبك من الكلام دا وركزي في شغلك وحفلاتك وأغنياتك.. الجمهور بيحب الأغاني الحلوة واللي يقدمها أيا كان اسمه ورسمه وبغض النظر عن جنسيته ودينه وغيره، وسوزان بويل مثال واضح وصريح
شيلي مصر من دماغك لان اللي يعرفوا اسمك في مصر ما يعرفوش إنتي بتغني مصري ولا لبناني أصلا

ودمتم




يسمح بنقل أو استخدام المواد المنشورة بشرط ذكر المصدر أي نوع من التعدي يعرض صاحبه للمسائلة القانونية

هناك 3 تعليقات:

  1. يلي كاتب هذا الكلام بدي اقول لك عمر شمس العرب

    ما تتكلم على احد وهي دائما تقول احب الشعب المصري
    واحترمه ولكن دائما الصحافه تسألها لماذا لاتغنى بالهجه
    المصريه و المعروف ان نجوى من بدايتهاقررت الغناء بالهجه البنانيه فقط ياعالم ياناس نجوى اطيب قلب في العالم لو تعرفونها تحبونها وفيه حنونه معطائه

    اما شمس الغنيه فهذا لقب اطلق عليها

    ردحذف
  2. ايه المقال ده
    نجوى شمس الاغنية العربية
    نجوى الاميرة والملكة
    نجوى احنا منحبك كتيييييييييير
    اللي بحب بلده للدرجة دي حيحب الكل اكيد
    نجوى حياتي

    ردحذف
  3. لا يا حبيب قلبي
    ومع انو كومنتي متاخر بس حبيت وضحلك شي
    من اول مابلشو الصحافيين يسالو نجوى ليه مابتغني مصري كانت بكل احترام تقول صوتي مش لابق للون المصري
    وهاد الشي واقع اذا بتسمع صوتا بتحسو مابيلبق يتغنى بالمصري وبتطلع الغنية مش زابطو بدليل اغنية لما راح الصبر منو ودارت الايام يلي غنتن بزمانا
    وبعد ما الصحافيين الحو عليها بالاسئلة وصارو يستفزوها حكت متل ما قلت وهية مش قصدها تقلل من المستوى الفني لمصر
    بس دي الحقيقة صوتا مش لابق يتغنى بالمصري لانو جبلي واللهجة المصرية بدها صوت ناعم رومنسي وحنون متل اليسا ونانسي وغيرن
    بتمنى اني كون وضحت الفكرة
    وشكرا

    ردحذف